DILI, 24 outubru 2023 (TATOLI) – Organizasaun internasionál, Catholic Relief Services (CRS), oferese ona ai-horis agroflorestál rihun 73 ba uma-kain 730 iha munisípiu Baucau no Viqueque hodi kuda iha to’os laran.
Objetivu husi distribuisaun ai-horis ne’e atu ajuda agrikultór sira halo planu jestaun ba floresta, hanorin komunidade kona-ba prátika agrofloresta atu evita kuda to’os ba mai no halo kapturasaun ba karbonu.
“Totál ai-horis ne’ebé ita fó ona ba komunidade iha munisípiu rua ho uma-kain 730 hamutuk rihun 73 hodi sira bele kuda iha sira nia to’os laran”, hatete Xefe Eskritóriu CRS munisípiu Baucau Alberto dos Reis Freitas, bainhira partisipa semináriu nasionál hatete ba Agência TATOLI iha Fatuhada-Dili.
Tipu ai-horis ne’ebé CRS distribui mak hanesan ai protesaun; Hali, ai-kakeu, mahoni, ai-kiar, ai-fao, marungi atu proteje rai labele monu. Enkuantu ai-fuan mak hanesan Avokat, rambutan, haas, hudi, sabraka, salak, kakau, kulu-Jaka no derok atubele konsumu. Ai enerjia mak hanesan ai-matan dukur no ai-kafe ne’ebé komuniade sira bele tesi no sunu tanba ai sira moris lalais liu fulan-tolu.
Viveiru sira ne’e foti husi Millenium Company no hetan apoiu husi Ministériu Agrikultura no Peska hodi fó ba komunidade sira.
Atividade distribuisaun ai-horis ne’e liuhusi programa Transforming Rural Live Through Adaptation Carbon Capture (TRACC) ne’ebé apoiu husi Governu Austrália ho orsamentu liu rihun $700 ne’ebé hahú tinan ida ne’e no termina iha tinan oin.
Notísia relevante: CRS entrega apoiu umanitáriu ba komunidade uma-uain kraik
Jornalista : Jesuína Xavier
Editór : Florencio Miranda Ximenes
