BOBONARO,25 outubru 2023 (TATOLI)-Ministériu Juventude Desportu Arte no Kultura (MJDAK), kuarta ne’e, halo ona sosializasaun ba estudante sira kona-ba prosesu selesaun ba membru parlamentu foinsa’e periodu 2024-2026 liu-liu ba estudante sira iha postu administrativu Maliana, Munisípiu Bobonaro.
Xefe Ekipa ba Dezaminasaun Programa Parlamentu Foinsa’e, munisípiu Bobonaro, Martinho Araújo da Costa, hateten sosializasaun ne’e importante atu divulga informasaun ba estudante, professor no autoridade lokál sira hodi fo motivasaun ba estudante no joven sira hosi tinan 12 to’o 17 atu bele aplika ka kandidata-aan ba membru parlamentu foinsa’e iha nível postu administrativu.
Durante sosializasaun ne’e, MJDAK foka liuliu kona-ba papél no kompromisu governu nian ba programa parlamentu foinsa’e no parseiru implementadór alumni parlamentu foinsa’e Timor-Leste (APFTL) inklui asuntu téknika ba prosesu rekrutamentu.
“Ita-nia autoridade sira, estudante, mestre sira bele iha konesimentu no intendimentu kona-ba oinsa mak aplikantes sira bele aplika sira-nia dukumentu hodi sai kandidatu ba membru parlamentu foinsa’e,” nia hateten ba jornalista sira iha edifisíu administrasaun postu administrativu Maliana.
Tuir kalendáriu ne’ebé públika ona katak hahú hosi loron 23 fulan-outubru 2023 estudante sira bele priense ona formuláriu hodi submete ba parte eskola no postu administrativu sira.
Nia dehan, hafoin submete dukumentu iha loron 15 fulan-novembru mak sei determina kandidatu sira eleitu ba membru feto ida no Mane ida hodi reprezenta nivél postu administrativu.
“Ha’u enkoraja foinsa’e sira atu bele partisipa tanba ida ne’e hanesan espasu ida ba foinsa’e sira atu hasa’e sira-nia konesimentu no abilidade seluk hodi sai sidadaun ne’ebé ida demokratiku, siviku no sidadaun ida responsavél,”Nia hateten.
Iha fatin hanesan Estudante Ensinu Sekundáriu Jerál númeru 1 Dom Martinho da Costa Lopes Maliana, Macario Lobato, sente kontente no orgullu tánba liuhosi dezaminasaun ne’e bele motiva sira kandidatu-an ba membru PFS.
“Liu hosi parlamentu foinsa’e bele loke ami-nia neón núne’e ami bele sai forte liután hanesan maun-bot sira iha parlamentu atu hatene hamrik iha oin kona-ba halo debate krítika no buat seluk-seluk tan”Nia dehan
Partisiapa iha programa ne’e maihosi estudante ESG, Dom Martinho da Costa Lopes Maliana, Ensinu Sekundariu Tekniku Vokasionál Malibaka Yamato Maliana, KAFÉ Maliana, Ensinu Baziku Centrál (EBC) númeru 2 Maliana, EBC Raifun no seluk tán.
Enkuantu, parlamento foinsa’e nu’udar fatin ba foinsa’e sira atu aprende ho pratika Demokrasia, Lideransa no formasaun sidadania hodi sai sidadaun siviku no responsavél mak hatúr iha rezoluasaun governu númeru 23/2009,18 novembru ho alterasaun dahuluk rezolusaun governu ho númeru 47/2017,16 agustu kona-ba parlamentu foinsa’e nian (PFN).
IV Governu konstituisionál lideradu hosi primeiru Ministru, Kayrala Xanana Gusmão, iha tinan 2009 kria ona parlamentu foinsa’e nian nu’udar espásu aprendizajen no pratika demokrasia,kultura debate no forma partisipasaun iha vida politíka ho karakter permanenti apartidariu.
Notísia Relevante:PR sei enkamina rekomendasaun APFTL ba Governu
Jornalista: Sergio da Cruz
Editór: Agapito dos Santos
