DILI, 08 novembru 2023 (TATOLI) – Diretór Administrasaun Finansas no Lojístika iha Hospitál Nasionál Guido Valadares (HNGV), Raul Humberto Gama, hateten HNGV tau orsamentu ba akizisaun ba aimoruk emerjénsia ho valór rihun $200 no konsege ezekuta ona 60%.
“HNGV tau orsamentu ba sosa aimoruk emerjénsia bainhira INFPM nia estoke out iha tinan 2023, HNGV tau osan $200 mil, ne’e atu prevene de’it bainhira aimoruk estoke mamuk iha INFPM”, nia hatete iha nia kna’ar fatin, ohin.
Iha fatin hanesan, Diretora Servisu Apoiu Diagnóstiku Therapeutiku iha HNGV, Mingota da Costa Herculano, informa bainhira aimoruk vitál balun estoke la iha, HNGV mak halo kompra emerjénsia iha klínika privadu sira.
“Ita iha osan hodi kompra emerjénsia, maibé ita hatene katak kompras emerjénsia ne’e atu responde ba emerjénsia nian, ne’e la’os atu kobre tinan ida nia laran tomak, maibé kompra emerjénsia ne’e ba responde ba semana ida nia laran de’it”, nia dehan.
Jornalista : Felicidade Ximenes
Editór : Zezito Silva
