BOBONARO, 13 novembru 2023 (TATOLI)-Prosesu eleisaun xefe suku segunda volta, ne’ebé hahú loke tuku 09:00, partisipasaun eleitór iha aldeia Ritabou, suku Ritabou, postu administrativu Maliana, munisípiu Bobonaro menus tebes kompara ho eleisaun primeira volta.
Xefe eleitór Aldeia Ritabou, Nelson Araújo do Carmo, esplika, eleitór iha aldeia ne’e hamutuk 540, maibé partisipasaun menus iha eleisaun segunda volta tanba eleitór barak mak eskola no servisu iha Dili.
Notísia Relevante:CNE Bobonaro avalia realizasaun eleisaun suku volta dahuluk
“ita halo previzaun eleisaun primeira ronde no segunda ronde ne’e taxa partisipasaun segunda ronde ne’e menus, tanba eleitór partisipa iha primeira ronde ne’e 316, agora ita haree tuku 10 resin ona seidauk meudia mos mamuk tiha ona, ita bele halo kalkulasaun de’it, parese orsida ne’e 200 karik,” nia informa ba jornalista sira, hafoin ezerser direitu votu.
Xefe aldeia foun ne’e kondeira,ñ problema ne’e akontese tanba falla no menus kontrolu hosi governu.
“loloos eleisaun ida-ne’e atu halo iha 28, governu tenke hatún mandadu ida, funsionáriu balu iha eleisaun primeira ronde no segunda ronde, la partisipa iha eleisaun, maibé ita atu haree realidade, servisu iha nasaun ida, hetan vensimentu hosi estadu maibé la ezerse sira-nia votu, ba lidera komunitária, ne’e oinsá ho estadu ida-ne’e nia hanoin. Ha’u husu ba estadu ho governu se bele labele akontese tán,” nia fó hanoin.
Nia akresenta komunidade iha aldeia ne’e barak mak la satisfaz ho prosesu eleisaun,tánba ne’e husu ba governu atu altera leí eleisaun suku númeru 09/2016 iha futuru.
Eleitór aldeia Ritabou, Jacinto Viegas Vicente ‘Roque’, hateten maske okupadu ho servisu iha Dili, maibé kontinua ezerse direitu votu iha eleisaun segunda volta, tanba ne’e nu’udar dever obrigatoriu sidadaun suku ida nia.
“Hau aban bainrua fila mai, suku ida ne’e, xefe suku ne’e mak sei ikun ha’u, o atu prezidente mai to’o iha ne’ebé, tama suku ne’e ita-nia lideransa mak xefe suku, núne’e tenke iha dever atu mai hili ida,” nia hateten.
Veteranu ne’e mos husu ba xefe suku Ritabou eleitu atu bele tau-matan didiak ba suku, liuliu komunidade sira iha área rurál.
“Haree ba dezenvolvimentu iha suku, ita-nia kbiit laek sira, faluk, kontinua tau-matan ba sira, atu nune’e sira bele morís hetan buat ruma hansan sira seluk” Eis deputadu ne’e fó hanoin.
Tuir observasaun Agencia Tatoli iha terrenu nota katak, menus taxa partisipasaun eleitór ne’e akontese mos iha Sentru votasaun aldeia Timatan no Samelaun.
Enkuantu Kandidadu na’in-rua ne’ebé kompete atu sai xefe suku Ritabou ba manda tinan hitu mak hansan Florindo Lesu Bere no Maximiano dos Santos Araújo.
Notísia relevante: Suku 27 avansa eleisaun segunda volta
Jornalista: Sérgio da Cruz
Editór: Evaristo Soares Martins
