VIQUEQUE, 15 novembru 2023 (TATOLI)-Kandidatu xefe suku Uaitame, postu Uatulari, munisípiu Viqueque, eleitu, Marcelino Pinto Alves, kompromete katak sei tau prioridade ba abitasaun no ekonomia ba abitante Uaitame, iha mandatu entre 2023-2030.
“Iha eleisaun xefe suku Uaitame ami kandidatu hamutuk na’in ne’en, ha’u-nia maluk na’in haat hela, ha’u avansa ba segundu périodu ne’ebé povu Uaitame fó konfiansa fila fali mai ha’u hodi lori suku Uaitame ba oin. Programa prioridade ne’ebé ha’u sei lori maka kria abitasaun, loke bairru foun atu alarga abitante sira no hadi’a ekonomia suku-laran hodi povu bele asesu liuliu ba setór agrikultór”, Marcelino Pinto Alves, hateten ba jornalista sira, iha sede suku Uaitame, kuarta ne’e.
Xefe suku eleitu ne’e hatutan, sei esforsu hodi reforsa agrikultór hasa’e produsaun hare no batar atu hasa’e ekonomia povu Uaitame nian no halo kooperasaun sosieade sívil no estensionista sira hodi dezenvolve setór agrikultura.
“Iha ha’u-nia mandatu períodu ida-ne’e ha’u sei esforsu hodi reforsa povu agrikultór buka koopera ho sosiedade sívil no parte agrikultura dezenvolve agrikultura liuliu ba área pekuária, ortikultura no hare,” nia realsa.
Alende ne’e nia dehan, sei kontinua programa sira-ne’ebé xefe suku tuan husik hela no konvoka enkontru ho membru konsellu suku sira hodi deside programa prioridade seluk iha kada aldeia lima ne’ebé eziste.
“Alende ha’u-nia planu prioridade ne’ebé ha’u sita, ha’u mós sei kontinua ba programa sira-ne’ebé xefe suku tuan halo seidauk ramata hanesan Uma Naroman ba Povu (UNP). Ha’u sei konvoka enkontru ho konsellu suku no xefe aldeia sira hodi deside programa prioridade sira kada aldeia nian,” nia hato’o.
Iha fatin hanesan, xefe átual suku Uaitame, José do Rosário, espresa rezulta votasaun ba Segundu volta kandidatu Macelino Pinto Alves maka sai vensedór ho votu validu 489 no kandidatu Noimia G. Fernandes hetan votu válidu 357 hosi eleitór totál suku Uaitame hamutuk 1.161.
“Durante iha ha’u-nia mandatu programa balun seidauk hotu hanesan UNP, bee-moos ba Aldeia Sana no edifísiu eskola pre-eskolár Sana ne’ebé maka seidauk finaliza. Nune’e xefe eleitu agora halo kontinua hodi finaliza, maibé la’ós xefe suku eleitu mesak, maibé ha’u mós sei apoia nu’udar Uaitame-oan, atu dezenvolvimentu iha suku Uaitame bele la’o di’ak,” nia garante.
Jornalista : Vitorino Lopes da Costa
Editór : Rafael Ximene de A. Belo
