VIQUEQUE, 22 novembru 2023 (TATOLI)—Implementasaun atividade Programa Mão de Obra Postu Administrativu (PMOPA) iha postu Viqueque Vila faze daruak daudaun finaliza ona.
“Impelementasaun PMOPA iha suku 10, postu Viqueque Vila ramata ona no halo ona pagamentu. Hosi suku 10 ita envolve traballadór hamutuk na’in-900,” Administradór postu Viqueque Vila, Duarte Soares Brandão, informa, iha ninia knaar fatin, postu Viqueque Vila, kuarta ne’e.
Implementasaun programa ne’e iha suku ida mak ba fali suku seluk nune’e responsável sira fásil kontrola.
“Tanba bainhira ita implementa iha suku 10 ne’e dala-ida maka ami hasoru difikuldade hodi monitoriza nune’e maka ami implementa iha suku ida to’o 10 ne’e hotu,” nia akresenta.
Notísia relevante : Postu Viqueque Vila loke dalan tolu liuhosi implementasaun PMOPA
Kada suku maka deside programa hodi aprezenta ba postu depois implementa, hanesan suku Maluru iha atividade tolu, kompostu hosi hamoos suku laran, tasi ibun no semitériu ho durasaun serbisu loron-54, envolve traballadór na’in-60, ho orsamentu hamutuk $5.508.
Suku Uma-Uain Kraik iha atividade ualu kompostu hosi hamoos estrada ninin, semitériu, bairru laran, baleta, kampu aviasaun Nahaeboruk no kuda ai-oan, ho durasaun serbisu 95, envolve traballadór na’in-100, ho orsamentu hamutuk $9.690.
“Ami implementa ona atividade PMOPA iha postu Viqueque Vila hamutuk 47, ne’ebé suku ida-idak maka deside sira-nia planu ba atividade, hahú faze dahuluk no faze daruak ninia orsamentu totál hamutuk $100.000,” Administradór hateten.
Nia konsidera implementasaun programa ne’e di’ak tanba bele fó benefísiu ba abitante sira ne’ebé la hetan serbisu.
“Ha’u sente programa ida-ne’e di’ak tanba fó duni benefísiu ba abitante sira ne’ebé durante ne’e la hetan serbisu. Hosi programa ne’e sira bele envolve-an hodi hetan osan. Aleinde ita-nia abitante sira hetan osan, ambiente suku laran sai moos no halo lutu ba sede suku sira,” nia realsa.
PMOPA fó benefísiu ba abitante sira hodi rekupera ekonomia familár, maibé atu kontinua program ida-ne’e depende ba Governu.
“Ha’u sente programa ne’e fó benefísiu ba ita-nia abitante sira, maibé programa ne’e atu kontinua ka la kontinua depende ba Governu agora nia planu,” nia tenik.
Jornalistan : Vitorino Lopes da Costa
Editora : Julia Chatarina
