DILI, 22 novembru 2023 (TATOLI) – Xefe Sentru Saúde Cailaco, Anina Afonso Gonçalves, informa rekursu umanu Iha Sentru Saúde Cailaco la sufisiente atu halo atendimentu ba pasiente sira.
“Ita-nia rekursu umanu menus difikulta tebes atendimentu pasiente nian, bainhira sira presiza halo tratamentu urjente tanba iha ne’e, ami-nia médiku permanente na’in rua no kontratadu na’in rua, parteira na’in tolu maibé sira nia kontratu sei remata iha fulan dezembru agora, tanba ne’e ami husu ba Governu liuhosi MS bele rekruta tan pesoál saúde balun mai iha Sentru Saúde Cailaco, atu bele fó tratamentu ba pasiente sira ho di’ak”, Anina Afonso Gonçalves, dehan iha nia kna’ar fatin Cailaco.
Nia hateten, Governu la rekruta tan pesoál saúde balun mak Sentru Saúde Cailaco sei taka tanba profisionál saúde menus.
“Bainhira Governu la rekruta profisionál saúde mak Sentru Saúde Cailaco sei taka hodi loke de’it iha Postu Saúde Genulai no Postu Saúde Asalau, atu nune’e bele halo atendimentu ba pasiente sira tanba ami iha ne’e menus ba rekursu umanu”, nia afirma.
Iha sorin seluk, Vise Ministru Fortalesimentu Instituisionál Saúde, Jose dos Reis Magno, hateten Ministériu Saúde iha 2024 sei fó atensaun ba rekursu umanus iha área remota.
“Ami rekoñese katak daudaun ne’e ita menus rekursu umanus iha territóriu nasionál tanba ne’e iha 2024 ita sei tau atensaun ba profisionál saúde iha área remota”, nia konklui.
Jornalista : Felicidade Ximenes
Editór : Zezito Silva
