BOBONARO, 27 novembru 2023 (TATOLI) – Institutu Nasionál Formasaun Dosente Profisionál Edukasaun (INFORDEPE) hamutuk ho Embaxadora Portugál iha Timor-Leste, Manuela Barros, segunda ne’e atribui sertifikadu ba profesór na’in-316 iha munisípiu Bobonaro ne’ebé frekuente kursu profisiénsia Língua portugés nível (A2) durante fulan-lima.
Koordenadór Gabinete Peskiza Dezenvolvimentu Monitorizasaun no Avaliasaun hosi INFORDEPE, Venancio Tilman, esplika, Governu Timor-Leste koopera ho governu Portugál realiza kursu prifisiénsia língua portugés refere hodi fasilita no profisionaliza manorin-na’in sira iha prosesu ensinu no aprendizajen.
Notísia relevante: ME husu Prezidente foun INFORDEPE kria modelu formasaun distánsia ba profesór sira
“Objetivu hosi kursu ida-ne’e atu kompleta prosesu intervensaun hodi fasilita profeór sira-nia nesesidade formasaun, sira kompleta ona kursu ho oras 120. Totál ema na’in-300 resin, iha 91% totál estimativa primeiru, sira 9% mak la konsege tanba razaun lubuk ida inkluindu la pasa teste,” Vise-Prezidente INFORDEPE ba asuntu peskiza dezenvolvimentu monitorizasaun, ko’alia iha Jinájiu Maliana.
Nia hatutan, atribuisaun sertifikadu ne’e hanesan símbolu de rekoñesimentu ba aproveitamentu formandu sira-nian liuhosi prosesu partisipasaun kursu lubuk ida, no sertifikadu ida-ne’e sei kontribui ba profesór no profesora sira-nia dezempeñu, liuliu iha konsiderasaun avaliasaun sira hotu.
Intensaun realiza kursu ne’e ba manorin sira-nia vida iha portugés, atu portugés bele moris iha kontaktu, tantu kontaktu primáriu no sekundáriu liuhosi manorin sira-nia família no estudante sira iha prosesu ensinu no apredizajen.
“Kursu ida ne’e hanesan kursu profisiénsia Língua, oinsá bele profisionaliza sira nia-an nu’udar mestre liuhosi abordajen rekursu lingístiku, partikularmente língua portugueza, tanba ita hatene katak iha termu, iha referénsia lubuk ida ne’ebé konsidera katak Português Como Uma Janela Para Olhar Forra, entaun iha konteúdu no referénsia lubuk ida ho portugés, até orientasaun legál iha lei baze edukasaun katak Português Como Língua Instrução de Ensino,” nia katak.
Formandu José Letto, sente orgullu no agradese ba governu Timor-Leste no Governu Portugues ne’ebé fó ona portunidade ba sira partisipa kursu refere.
“Kursu ne’e importante ba ha’u nu’udar profesór atu nune’e bele apoia ha’u iha sala laran, entaun ha’u nu’udar profesór timoroan espera katak aprofunda nafatin kursu ne’e,” nia hateten.
Notísia relevante: Edukasaun Manatuto husu INFORDEPE taka sentru formasaun língua portugeza iha Laleia
Jornalista: Sérgio da Cruz
Editór: Evaristo Soares Martins
