DILI, 28 novembru 2023 (TATOLI)—Prezidente Parlamentu Nasionál (PPN), Maria Fernanda Lay, apela timoroan hotu liliu joven atu kria pas no unidade hodi bele hadia dezenvolvimentu iha rai-laran.
“Ohin, Timor-Leste selebra aniversáriu loron proklamasaun independénsia unilaterál ba dala-48, ita hein katak ho sakrifíaiu hosi erói sira-ne’ebé mate, ita bele fó liman ba malu hodi serbisu ho di’ak liu ba dezenvolvimentu tanba rai ida-ne’e presiza ita-nia unidade. Apela ba joven sira kria estabilidade iha rai ne’e importante tebes ba ita-nia rai, hodi hodi dezenvolve ekonomia no selu-seluk tan,” PPN ne’e hateten ba jornalista sira hafoin partisipa komemorasaun loron istóriku proklamasaun indepedénsia unilaterál ba dala-48 ho tema “Celebrar a História e Construir o Futuro”, iha Palásiu Prezidensiál Nicolau Lobato, Bairru Pite, tersa ne’e.
Lidér órgaun soberania daruak ne’e hateten, ho diskursu Prezidente Repúblika José Ramos Horta nian iha komemorasaun loron istóriku ne’e povu no parte hotu atu hamutuk hodi lori dezenvolvimentu nasaun ba oin.
“Espera diskursu Prezidente Repúblika ohin, atu povu tomak, na’in-ulun sira inklui Parlamentu Nasionál bele iha konsiénsia ba ida-ne’e, atu tenke serbisu hamutuk ba povu Timor-Leste ne’ebé presiza dezenvolvimentu ho kampu traballu liuliu ba ita-nia joven sira,” nia hateten.
Iha parte seluk, Prezidente PN ne’e husu Governu tenke tau matan oinsá intensifika istória Timor-Leste bele hanorin ba joven no estudante sira hodi hatene istória, tanba nia observa ezemplu hanesan ino nasionál “Patria! Patria!” ne’e, joven no estudante balun lahatene kanta mezmu hanesan simbolu nasaun nian.
Jornalista : Nelson de Sousa
Editór : Cancio Ximenes
