DILI, 01 dezembru 2023 (TATOLI)—Ministériu Agrikultura, Pekuária, Peska no Floresta (MAPPF) prevee millaun $30.694.052 iha proposta-lei Orsamentu Jerál Estadu (OJE) 2024 hodi fó prioridade ba programa aumenta produsaun iha rai-laran.
“Orsamentu ne’e ita prevee ba programa importante liu mak ba aumenta produsaun no produtividade ba agrikultura inklui haree, batar, modo, depois mós animal no peska. Depois mós oinsá proteje ita-nia ambiente ai-horis no área florestál ne’ebé halo reflorestasaun no protesaun,” Ministériu Agrikultura, Pekuária, Peska no Floresta (MAPPF), Marcos da Cruz, hateten ba jornalista sira hafoin ramata halo audiénsia públika proposta OJE 2024 ho komisaun D trata asuntu Ekonómia no Dezenvolvimentu iha Parlamentu Nasionál, sesta ne’e.
Atu aumenta produsaun rai-laran, nia hatutan, ministériu mós prevee ona ba tinan oin hodi hola tan tratór boot unidade hamutuk 25 ho tratór kiik balun.
Ministériu mós prevee ona iha proposta orsamentu hodi tau programa no atividade ba aumenta produsaun nian mak sei dadi’a irrigasaun balun ne’ebé presiza halo kontrusaun no reabilitasaun hamutuk 10-resin iha territóriu nasionál.
Governante ne’e dehan, iha área pekuária mós sei buka sosa karau hodi komesa halo ezemplu ruma iha sentru produsaun hanesan iha Dotik, no peska nian tau osan hadi’a sentru viveiru produsaun ikan oan atu fahe ba populasaun sira-ne’ebé hakarak haki’ak no sei sosa ró balun hodi apoiu ba peskadór sira kaer ikan.
Jornalista : Nelson de Sousa
Editór : Cancio Ximenes
