VIQUEQUE, 08 janeiru 2024 (TATOLI)—Progresu fíziku konstrusaun Uma Naroman ba Povu (UNP) unidade 356 iha munisípiu Viqueque daudaun ne’e atinje ona 69,55%.
“Progresu implementasaun UNP etapa II iha munisípiu Viqueque bazeia ba relatóriu dezembru 2023 ne’ebé maka ami-nia funsionáriu sira rekolla, kada postu daudaun ne’e atinje ona 69,55%. Enkuantu, relatóriu janeiru 2024 ami seidauk rekolla ninia progresu. Fulan ida-ne’e ramata mak foin update filafali,” Diretór Servisu Programa Nasionál Dezenvolvimentu Suku (PNDS) Viqueque, Francisco Soares Varela, informa ba Agência Tatoli, iha ninia knaar fatin, Administrasaun Viqueque, segunda ne’e.
UNP ne’ebé implementa iha postu administrativu Uatucarbau, Lacluta, Viqueque Vila, Ossu no postu Uatulari iha tinan 2022 ho tipu normál unidade 356 ho kustu $6.052.000 no UNP +A implementa iha postu Ossu no Uatulari unidade 125 ho kustu $1.625.000.
Notísia relevante : Progresu konstrusaun UNP 356 iha Viqueque atinje ona 60,16%
Implementasaun projetu UNP +A iha tinan 2022 iha postu Ossu atinje ona 45,89% no Uatulari atinje 71,53%, hosi totál uma unidade 125, ne’ebé ho progresu 58,76%.
“Hosi kontrusaun UNP +A postu rua no UNP regular ne’ebé implementa iha postu lima 58,90% iha uma balun finaliza ona, uma balun maka to’o agora seidauk finaliza tanba klima no eletrisidade sidade sai obstáklu ba ami hodi halo serbisu. Dezafiu seluk maka traballadór iha kada suku, tanba ita-nia pagamentu dalaruma tarde, entaun fó mós impaktu, tanba ne’e mak progresu tarde,” Francisco hato’o.
Nune’e, ba oin ekipa PNDS destakadu iha postu lima no munisípiu kontinua esforsu hodi finaliza uma UNP+A no regulár ne’ebé implementa iha munisípiu bazeia ba orientasaun Governu.
“Ami nafatin iha kompromisu hodi finaliza uma UNP +A no UNP regulár ne’ebé implementa iha munisípiu Viqueque. Nu’udar funsionáriu, ami prontu indika-an atu oinsá haree serbisu konstrusaun sira iha suku 36,” nia tenik.
Jornalista : Vitorino Lopes da Costa
Editora : Julia Chatarina
