DILI, 09 janeiru 2024 (TATOLI)—Prezidente Komisaun A trata asuntu Justisa no Konstitusionál iha Parlamentu Nasionál (PN), Deputadu Patrocínio Fernandes, husu IX Governu konstituisionál atu aprezenta proposta-lei reforma obrigatóriu ba funsionáriu públika (FP).
Notísia Relevante: KFP husu PN inísia lejislasaun reforma obrigatória ba funsionáriu públiku
“Reforma obrigatóriu ne’e polítika jestaun ida Governu ninian, tanba ne’e mak Parlamentu hein hela ezbosu ne’e tenke mai hosi Governu nu’udar proposta-lei,” Prezidente Komisaun A ne’e hateten ba jornalista sira iha uma fukun PN, tersa ne’e.
Tanba, tuir nis, Governu mak hatene didi’ak kona-ba jestaun polítika rekursu umanu Estadu ninian, tanba atu define ema ne’e to’o idade hira mak tenke reforma no nia to’o idade hira mak sei produtivu ho idade hira mak la produtivu ona, fatór sira-ne’e mak iha nia sirkustánsia makaas atu bele diskute iha lei ida-ne’e.
Lei reforma obrigatóriu ne’e aliénde ko’alia kona-ba ema-nia direitu, maibé ko’alia mós despeza Estadu sei implika, tan ne’e Governu mak mai ho proposta ida-ne’e adekuadu, komprensivu, hodi bele PN haree apresia no aprova.
Nune’e, Prezidente Komisaun A ne’e hateten ida-ne’e prioridade mós bainhira Governu submete mai PN liuhosi komisaun A ne’ebé haree materia ne’e sei tau prioridade diskusaun iha tinan ne’e.
Tanba, iha prioridade programa Governu prevee ona iha reforma administrasaun públika durante mandatu, tanba ne’e hein Governu sei tau atensaun no aprezenta inisitava lei sira mai PN mak hanesan komisaun A sei fó prioridade diskusaun.
Notísia Relevante: Agostinho Letêncio: “Durante mandatu sei foka ba programa prinsipál lima”
Jornalista : Nelson de Sousa
Editór : Cancio Ximenes
