COVALIMA, 12 janeiru 2024 (TATOLI) – Administrasaun Munisípiu Covalima (AMC) haruka ona karta hodi husu ba Komandu Polísia Nasionál Timor-Leste (PNTL) Covalima atu kontrola atividade jogu tradisionál bola guling ilegál ne’ebé la’o, tanba seidauk estende sira-nian lisensa.
Sekretáriu AMC, Francisco Alves, hatete, antes ne’e, atividade jogu tradisionál hetan lisensa husi Inspesaun-Jerál Jogu, maibé depois muda tiha ba Ministériu Turizmu nia okos seidauk iha orientasaun atu hasai lisensa ba jogu refere. “Nune’e, bainhira atividade jogu la’o konsidera ilegál”, dehan iha Tali-oan, ohin.
Frncisco Alves salienta katak sidadaun sira kontinua loke jogu bola guling iha bairru Leogore, Mata-air no Cendana iha suku debos postu Suai.
“Molok ne’e, sidadaun ne’ebé hala’o atividade jogu bola guling hetan lisensa no iha koñesimentu husi Autoridade Covalima, maibé tanba seidauk estende lisensa entaun konsidera ilegál”, reitera.
Komandante PNTL Munisípiu Covalima, Superintendente Polísia Calisto Gongaza, simu ona karta husi AMC iha semana kotuk relasiona ho sidadaun ne’ebé loke atividade jogu bola guling.
Daudaun jogu bola guling ne’ebé hetan ona lisensa maka iha bairru Sukaer-Laran no Leogore, maibé provizóriu seidauk hala’o atividade.
Calisto Gonzaga salienta katak maske hetan ona autorizasaun, maibé PNTL Covalima nafatin tau-matan, tanba liuhusi atividade refere kontribui reseita ba kofre Estadu no nia mós husu ba sidadaun ne’ebé loke jogu tradisionál maka laiha lisensa labele loke.
Notísia relevante: Feira 28 novembru iha Covalima promove produtu lokál no turizmu komunitáriu
Jornalista: Celestina Teles
Editora: Maria Auxiliadora
