DILI, 12 janeiru 2024 (TATOLI)–Sekretáriu Estadu Veteranu (SEV), Cesár da Silva “Merak”, hateten menoridade (labarik) ne’ebé uluk envolve-aan iha funu ne’e, sira hirak ne’e konsidera hanesan vítima da Guerra no sira sei la hetan pensaun hosi Governu.
“Menoridade konsidera hanesan vítima da Guerra. Vítima da Guerra labele hola parte hanesan kombatente libertasaun nasionál. No, iha verifikasaun ne’e ami identifika iha balun ne’ebé mak rejistu maibé inkonsiderasaun. Maibé ida-ne’e sei rezolve, ne’e signifika labele hetan pensaun hosi Governu,” Sekretáriu Estadu Veteranu (SEV), Cesár da Silva “Merak”, hateten ba Agência Tatoli, sesta ne’e,
Tanba, tuir nia, iha dekretu-lei númeru 3/2006 alterasau ba númeru 9/2009 katak se ó frente armada iha ai-laran tenke halo ona idade 16 ba leten no inklui sira-ne’bé luta iha vila laran.
“Uluk ami fó orden rejistu ne’e katak labarik kiik labele no ita tenke bazeia ba lei, katak frente armada tenke ho idade 16 ba leten no frente klandestina ho idade 15 ba leten. Kazu ida mai rejistu ho idade kiik ne’e iha ida-rua de’it. Sira-ne’e ita bele haree no prontu atu haree maibé presiza iha lagál ruma, nune’e bele atribui direitu ida ba sira,” nia dehan.
Ema-ne’ebé mak moris iha tinan 1980 sira-ne’e ba leten ne’e, sira bele rejistu maibé tinan 1990 ba leten mak labele rejistu.
Prezidente Konsellu Kombatente Libertasaun Nasionál (CCLN), Vidal de Jesus “Riak Leman”, hateten Ministeriu Asuntu Kombatente Libertasaun Nasionál (MAKLN) iha planu atu muda dedikasaun eskluzivu ho estudante envolve iha funu.
“Entaun ho ida-ne’e mak ami tuur hamutuk atu haree kona-ba dedikasaun eskluzivu ne’e, di’ak-liu altera tiha inklui kona-ba estudante no funsionáriu sira. Ida-ne’e lei la rekoñese, entaun ida-ne’e mak ita haree no tenke muda,” nia dehan.
Jornalista : Osória Marques
Editór : Cancio Ximenes
