DILI, 23 janeiru 2024 (TATOLI) – Sekretáriu Estadu Arte no Kultura (SEAK) Jorge Soares Cristovão hatete, Governu deside ona Artista Maria Madeira hodi reprezenta Timor-Leste iha 60th international art Exhibitions ne’ebé sei realiza iha Biennale Venezia Italia hahú 20 abríl too 24 novembru tinan ne’e.
“Ita nia preparasaun ba 60th international art Exhibitions ne’ebé sei realiza iha Biennale Venezia Italia hahú kedan outubru tinan kotuk, entaun ita sei reprezenta artista ida, entaun ita haree ona sé mak ita bele lori ba reprezenta Timor-Leste, entaun ita deside ona artista Maria Madeira mak reprezenta Timor-Leste iha eventu ne’e,” hatete Jorge ba Agência TATOLI iha Faról Dili, tersa ne’e.
Razaun fundamentál hili Artista Maria Madeira tanba priense kriteria hosi expo ne’e rasik.
“Ita atu hili artista ida ba partisipa iha eventu ne’e bazeia ba kriteria, hanesan nia tenke iha obra rasik, iha mós obra ruma iha galery internasionál,” nia dehan.
Nune’e, Governu mós sei hili tan asistente artista timoroan balun bá hamutuk ho artista Maria Madeira hodi apoiu malu no fó mós oportunidade ba artista timoroan sira hodi apriende iha expo ne’e tanba Timor-Leste foin da-uluk partisipa iha atividade ne’e.
Orsamentu ne’ebé Governu tau hodi apoiu Timor-Leste nia partisipasaun iha 60th international art Exhibitions ne’ebé sei realiza iha Biennale Venezia Italia hamutuk rihun $500.
Eventu ne’e, Timor-Leste mós sei lori tais, no sasan kulturál Timor-Leste nian hodi tau iha fatin expozisaun ne’ebé prepara ona ba Timor-Leste hodi tau nia sasan.
Hosi expozisaun ne’e iha tinan kotuk Primeiru Ministru Kay Rala Xanana Gusmão nomea ona SEAK, Jorge Cristovão nu’udar Komisáriu hodi lidera Timor-Leste partisipa iha expozisaun internasionál ne’e.
Jornalista: Hortencio Sanchez
Editór : Florencio Miranda Ximenes
