DILI, 29 janeiru (TATOLI)–Antigu alunu Salesiano Don Bosco Timor-Leste halo doasaun raan iha Ospital Nasionál Guidu Valdares (HNGV, sigla portuges) hodi komemora loron Don Bosco nia mate iha kada 31 janeiru.
Notísia Relevante: HNGV rejista doasaun raan 1.332 iha fulan tolu nia-laran
Antigu alunu Salesiano Don Bosco, Amandio Belo, hateten atividade doasaun raan ida-ne’e hanesan atividade solidariedade hodi fó raan turuk ida atu bele ajuda maluk sira-ne’ebé presiza iha ospitál.
“Atividade ida hodi bele sustenta no salva moris hosi moras. Hosi Antigu Alunu Don Bosco ne’ebé sei komemora loron Don Bosco nia mate iha 31 janeiru, entaun programa ida-ne’e hola parte iha selebrasaun ne’e. Ami nu’udar antigu alunu hosi Don Bosco nian iha Fatumaca, ami lubuk ida hakarak kontribui ba atividade ida-ne’e liuhosi doasaun raan ne’ebé ami fó,” nia hateten ba Agência tatoli iha Hospital nasionál Guido Valadares (HNVG, Bidau, segunda ne’e.
Membru komisaun organizadora, Veriato Manuel Quintas, hateten atu komemora loron Don Bosco iha 31 de janeiru, antigu alunu Don Bosco hala’o atividade ho naran “Dom Bosco hadomi ambiente” ne’ebé hala’o limpeza iha tasi ibun iha kapitál, halo reflesaun eukaristia, konfisaun no doasaun raan no merkadu kalan.
“Ami konvida eskola hotu ne’ebé iha espíritu Don Bosco nian, ami halo limpeza iha tasi ibun. Reflesaun ne’e rona amu sira liuliu oinsá mak familia Don Bosco tuir mehi Dom Bosco nian ho tema “mehi ne’ebé ema hotu mehi”. Entaun, ida mak asaun karitativa ba doasaun raan, hadomi ambiente, misa no merkadu kalan iha Don Bosco Comoro,” Veriato hateten.
Antigu alunu Salesioano Don Bosco konvida ema hotu atu bele partisipa iha festa loron 31 janeiru iha Don Bosco Comoro, tanba Dom Bosco iha lema ida hanesan “Aman, mestre no belun” ba foinsa’e no ba ema hotu.
Atividade doasaun raan ne’e bele marka ema hotu nia prezensa hodi fó raan voluntariamente ba iha HNGV ho objetivu atu ajuda ema seluk, tanba raan turuk bele salva ema nia moris,
Xefe Departamentu Banco de Sangue, Januário da Cruz Freitas, hateten antigu alunu Salesiano Don Bosco sira mai fó doasaun raan ba HNGV hodi apoia pasiente sira-ne’ebé presiza raan hodi hatutan moris.
“Ha’u mós antigu alunu Don Bosco nian, ami organiza atividade doasaun raan hosi antigu alunu Don Bosco hodi ajuda pasiente sira-ne’ebé presiza raan iha ospitál ida-ne’e,” nia dehan.
Januário da Cruz Freitas hateten, HNGV atende ohin loron tomak antigu alunu Salesiano Don Bosco sira-ne’ebé hakarak fó raan ba iha ospitál, no atividade doasaun raan hosi antigu alunu sira-ne’e foin primeira-vés hala’o maibé ba oin sei organiza ka tinan.
Banku de sangue HNGV menus tipu raan B no AB
Entretantu, Xefe Departamentu Banku de sange Hospital Nasionál Guido Valadares (HNGV), Januário da Cruz Freitas, hateten stock raan ne’ebe menus mak tipu raan B no AB hodi atende pasiente sira-ne’ebé presiza.
“Ita iha stock raan mak tipu raan rua A no O, maibé ran B no AB mak menus hela. Maibé ba loron ohin, ita garantia katak ita bele hetan para hodi bele mantein stock raan iha banku de sangue,” Januário da Cruz Freitas hateten.
Tipu raan A iha 20 pakote hosi familia no hitu (7) hosi ema voluntáriu sira, tipu raan O iha pakote 15 ne’e doasaun ne’ebé halo hosi família familia no lima (5) hosi doasaun voluntaria, tipu raan B iha hitu (7) no tipu raan AB iha hitu (7).
Xefe departamentu ne’e apela ba públiku atu bele kontribui voluntariamentehalo doasaun raan ba iha HNGV hodi bele salva pasiente sira-ne’ebé presiza raan.
“Husu ba populasaun tomak bele mai fó raan ba ita-nia pasiente ne’ebé mesak familia, maluk ne’ebé agora daudaun presiza raan. Ne’e la’ós ema seluk, mesak timoroan, familia no raan ida de’it,” nia dehan.
Nia hateten, HNGV servisu hamutuk ho Cruz Vermelha Timor-Leste hodi sensibiliza populasaun hodi bele oferese raan ba ospitál sira iha territóriu nasionál.
“Banco de sangue simu doasaun raan fulan ida hosi familia hamutuk 3.000 no voluntaria to’o 1.000 ba HNGV,” nia hateten.
Jornalista : Jesuína Xavier
Editor : Cancio Ximenes
