DILI, 31 janeiru 2024 (TATOLI)—Diretór Ezekutivu Ajénsia Teknolojia no Komunikasaun, Institutu Públiku (TIC Timor, I.P), Venâncio Pinto, hateten, la fásil atu deteta konta facebook falsu iha Timor-Leste tanba prosesu komplesu tebes.
“Atu dehan la fásil deteta konta faceboot falsu ida, tanba tenke priense kritéria ida ne’ebé komplesu, maibé iha maneira seluk atu rezolve maka hakotu totál konta falsu ne’e,” Diretór informa liuhosi programa entrevista eskluziva live streaming, iha estúdiu Agência Tatoli, Farol, kuarta ne’e.
Nia dehan, Timor-Leste nu’udar Estadu Direitu Demokrátiku, tanba ne’e parte TIC Timor sei buka maneira hotu hodi kontaktu ho na’in ba facebook hodi haree ba kestaun ne’e.
“Daudaun ami iha hela prosesu atu kontaktu ho na’in ba facebook hodi haree kestaun sira ne’e maibé ha’u labele fó kedas garantia katak sira disponibiliza no aseita ho ita-nia pedidu maibé ami sei halo esforsu hotu,” nia akresenta.
Nia konsidera facebook nu’udar meiu ida atu fó sai hoax, tanba ne’e TIC Timor sei halo koordenasaun ho Sekretaria Estadu Komunikasaun Sosiál (SEKOMS) hodi tempu badak bele diskute kle’an.
Notísia relevante : MTKI sei asina akordu rua ho Governu Indonézia
Iha sorin seluk, TIC Timor ho SEKOMS halo ona negosiasaun ho Google iha Jakarta-Indonézia hodi bele haree joven timor-oan ne’ebé hanesan kriadór konteúdu iha Youtube bele hetan rendimentu.
“Sira fó ona lampu azul tanba iha dezembru 2023 ha’u rasik ba to’o tiha ona sira-nia fatin iha Jakarta hodi halo aprosimasaun tanba sira-nia baze iha Singapura. Tanba SEKOMS mós iha ona kontaktu direta ho sira,” Venâncio tenik.
Momentu Sekretáriu Estadu Komunikasaun Sosiál, Expedito Dias Ximenes, hala’o vizita bá Jakarta, hakarak hasoru tan ekipa hosi Google maibé la konsege.
“Maibé diskusaun ba serbisu no kooperasaun la’o dook ona, ne’ebé re-ajenda fali bainhira sira hasoru malu, ha’u labele adianta lai tanba ami ne’e fasilitadór de’it,” nia tenik.
Maibé iha dokumentu ne’ebe foin lalais Timor-Leste asina ho Indonézia, TIC Timor integra mós asuntu importante ne’e iha laran ho intensaun atubele iha dalan katak bainhira sé de’it mak prodús vídeo no hetan apresiasaun barak liu bele hetan rendimentu hosi Youtube no Google.
Jornalista : Antónia Gusmão
Editora : Julia Chatarina
