DILI, 03 maiu 2019 (TATOLI) –Ministériu Reforma Lejizlativa no Asuntu Parlamentár (MRLAP) kongratula jornalista sira iha ámbitu komemorasaun loron liberdade imprensa ba tinan 2019 ne’e tanba konsidera katak liberdade imprensa mak pilár ba demokrasia.
“Parabéns ba jornalista sira iha Timór laran tomak ba loron liberdade imprensa nian. Husu atu ita boot sira kontinua servisu ho di’ak tanba liberdade imprensa mak pilár ba demokrasia no dezenvolvimentu nasaun nian,” kongratula Ministru Reforma Lejizlativa, Fidelis Leite Magalhães ba jornalista sira iha Pálasiu Governu, sesta (03/05).
Governante ne’e akresenta katak relasiona ho loron liberdade imprensa ne’e, iha buat barak mak presiza hadi’a hanesan kualidade reportajen, koñesimentu no hakerek.
“Liberdade ne’e lulik. Ita garante liberdade imprensa, hafoin mak bele ko’alia oinsá bele hadi’a. Agora tanba problema ho kualidade mak ita dehan tenke kontrolu ne’e la loos,” hateten Ministru Fidelis Magalhães.
Nune’e governante ne’e kompromete: “Governu prontu atu presta apoiu ho parseiru dezenvolvimentu sira hodi haree oinsá kapasita liután kualidade imprensa, tanba ida ne’e importante ba lejitimidade rasik”.
Governante ne’e mós dehan, mídia Timor-Leste sei presiza liután hadi’a nia an para iha respeitu ne’ebé boot liután. “Por em quanto Liberdade imprensa ne’e lulik tanba ne’e mai ita servisu hamutuk fó espasu nafatin atu partisipa reforma konstrutiva iha dezenvolvimentu”.
Lee mós notísia: http://www.tatoli.tl/2019/05/ki-komemora-loron-mundial-liberdade-imprensa-ho-marsa/
Jornalista : Julia Chatarina
Editór : Rafy Belo
