DILI, 27 fevereiru 2024 (TATOLI)–Primeiru-Ministru (PM), Kay Rala Xanana Gusmão, hala’o enkontru ho Konstitusionalista portugés, Pedro Bacelar de Vasconcelos, hodi diskute asuntu importante sira iha área judisiáriu, edukasaun no estratéjia dezenvolvimentu nasaun.
Pedro Bacelar de Vasconcelos nu’udar sidadaun portugés, ne’ebé sai belun di’ak ida ba povu Timor-Leste, ne’ebé kontribui no fahe ninia matenek oin-oin iha prosesu harii dame no Estadu tuir regra demokrátiku. Nune’e, Xefe Governu konvida Pedro Bacelar vizita mai Timor-Leste atu kontinua husu ninia opiniaun no matenek atu ajuda hadi’a dezenvolvimentu.
“Primeiru-Ministru manifesta nia preokupasaun sira ne’ebé ligadu ho kompromisu ne’ebé hato’o hamutuk ho eleitór sira. Buat sira ne’ebé sai preokupasaun pertinente no kria espetativa ba tinan ida-ne’e no simultaneamente buat sira ne’ebé parese komplexu no demoradu ein termu kualifikasaun iha sistema ensinu no iha reforsu de justisa ne’ebé projeta iha médiu no longu prazu, tuir ho asaun Governu no kontinua kooperasaun iha área ensinu no área justisa ne’ebé eziste dezde iha tinan naruk ho ha’u-nia país, no universidade portugeza sira nomós ho instituisaun sira ne’ebé empeñadu hodi apoiu iha kooperasaun internasionál,” Pedro Bacelar haktuir hafoin enkontru ho PM Xanana, iha Palásiu Governu, tersa ne’e.
Durante enkontru, péritu ne’e transmite mós mensajen saudasaun hosi Governu Portugal hanesan jestu profunda amizade ida ho Governu no povu Timor-Leste.
“Dezde tinan 2000, ha’u halo perigrinasaun to’o iha Timor-Leste, iha buat ruma nebé sempre útil ha’u bele kontribui ba progresu dezenvolvimentu no afirmasaun ba independénsia povu ida-ne’e, ne’ebé oportunidade boot hodi konversa ho Xefe Governu. Ha’u transmite kumprimentu no saudasaun hosi Governu ha’u-nia país nian ba Primeiru-Ministru no povu Timor-Leste,” nia akresenta.
Notísia relevante : Xefe Estadu husu Grupu Traballu halais servisu ba reforma justisa
Aleinde ne’e, entidade rua ne’e diskute mós kestaun oin-oin hanesan interese komum, eziste projetu ne’ebé la’o hela, liu-iu programa kooperasaun hahú hosi justisa, edukasaun, estratéjia dezenvolvimentu hodi reforsa lasu amizade entre Portugal no Timor-Leste.
Profesór Direitu Públiku no Antigu Governadór Sivil Braga-Portugal ne’e reforsa tan katak, durante enkontru ho PM Xanana sira diskute mós kona-ba interese komum iha área oin-oin, liu-liu ligadu ho projetu formasaun no programa koopersaun sira seluk.
Hafoin enkontru, Xefe Governu ho kontente tara tais no entrega kafé Timor ba Pedro Bacelar nu’udar agradesimentu hosi povu no Governu Timor-Leste.
Jornalista : Antónia Gusmão
Editora : Julia Chatarina
