DILI, 28 fevereiru 2024 (TATOLI)–Embaixadór Koreia iha Timor-Leste, Shin Mantaek, husu ba traballadór timor-oan sira ne’ebé foin atu bá serbisu iha Koreia Súl tenke hatene respeita malu, liu-liu respeita ema rai-na’in.
Embaixadór kongratula traballadór sira ne’ebé hetan oportunidade serbisu, hanesan reprezenta Timor-Leste iha Koreia, ne’ebé tenke serbisu ho laran no respeita ema seluk.
“Ba ne’e reprezenta-an rasik, reprezenta nasaun no família, tanba ne’e tenke serbisu maka’as hodi ajuda ita-nia família, liu-liu inan no aman. Ema Koreia mesak ema ne’ebé serbisu maka’as. Tanba ne’e maka imi (traballadór) bá karik tenke serbisu maka’as, ida-ne’e parte ida hosi kultura ema Koreai nian, maibé tenke hatene respeita malu no hatudu hamnasa ba malu tanba ema Timor kulit metan oitoan, entaun ema Koreia hanoin siak-teen,” Embaixadór Shin Mantek hato’o mensajen bainhira akompaña Sekretáriu Estadu Formasaun Profisionál no Empregu, Rogério de Araújo Mendonça, despede traballadór molok desloka bá serbisu iha Koreia Súl, iha salaun Timor Lodge, Comoro, kuarta ne’e.
Nia fó ezemplu, iha serbisu fatin kuandu halo sala ruma karik tenke husu deskulpa maibé ho oin hamnasa, tanba aktu ne’e bele hatudu domin ba ema seluk,” nia akresenta.
Embaixadór apela ba timor-oan sira ne’ebé seidauk hetan oportunidade hodi halo esforsu hodi apreende lian Koreia.
Notísia relevante : Traballadór Koreia Kontribui Ona Osan Milliaun $45 Resin
Durante tinan 2023, timor-oan bá serbisu iha Koreia Súl hamutuk 885. Daudaun Governu Koreia Súl nafatin fó oportunidade, tanba ne’e daudaun esforsu-an hodi apreende lian inglés.
Kouta loloos ne’ebé Governu Koreia fó ba Timor iha tinan 2023 hamutuk na’in-1000 resin, maibé lakonsege responde númeru ne’e no lakon oportunidade.
“Koreia presiza traballadór, entaun timor-oan sira ne’ebé hakarak atu hadi’a ekonomia família hahú agora tenke apreende lian Koreia,” nia fó hanoin.
Diplomata Koreanu ne’e husu ba traballadór kaben-na’in sira atu enkoraja sira-nia parseiru hodi halo mós esforsu hodi bele ba hamutuk iha Koreia hodi serbisu no ajuda di’ak liután inan-aman.
Iha biban hanesan, Sekretáriu Estadu Rogério Araújo Mendonça, hateten, Governu sempre realiza seremónia despedida ho intensaun atu hato’o mensajen ba traballadór sira hodi la’o tuir regulamentu no prosedimentu.
“Governu sempre realiza serimónia despedida ba ita-nia traballadór sira bainhira husik ita-nia rai, bá serbisu iha nasaun seluk, nia objetivu mak Governu liuhosi SEFOPE hato’o mensagen ba ita-nia traballadór sira, atu sira bá serbisu iha ema-nia rai tuir duni regulamentu no prosedimentu nasaun rua ne’ebé iha tuir akordu G to G, entre Timor-Leste ho Koreia no Timor-Leste inklui Austrália,” Sekretáriu Estadu tenik.
Governante fundamenta liután, kultura hosi nasaun ida-idak la hanesan.
“Ita hotu hatene ona katak kultura nasaun hotu-hotu la hanesan, tanba ne’e husu ba traballadór ba serbisu tuir regulamentu Koreia nia, bainhira imi hanesan traballadór kuandu halo sala, liafuan deskulpa la’ós buat todan ida, husu deskulpa ho oin hamansa,” Sekretáriu Estadu tenik.
Nia mós husu ba traballadór sira ne’ebé foun ka foin mak atu bá, tenke halo adaptasaun ho ema-nia ambiente foun iha Koreia no hatudu disiplina ho maturidade iha serbisu fatin, hodi nune’e bainhira fila mai Timor-Leste, bele iha tan oportunidade hosi empregadór hodi bá serbisu iha ne’ebá.
Governante ne’e mós husu atu traballadór sira bainhira sai hosi Timor-Leste bá iha Koreia, atributu organizasaun rai hela ho família, nune’e fila mak bele uza fila fali iha rai-laran.
Traballadór ne’ebé asina deklarasaun iha ámbitu seremónia despedida hamutuk na’in-95, ne’ebé entre númeru ne’e iha na’in-tolu mak re-entry. Sira sei bá serbisu iha área peska no fábrika.
Jornalista : Antónia Gusmão
Editora : Julia Chatarina
