DILI, 29 fevereiru 2024 (TATOLI)–Autoridade relijioza hosi relijiaun Katólika, Protestante no Musulmanu konsidera autór sira-ne’ebé soe bebé ne’e la konsidera no la valoriza ema ida-nia moris hanesan Maromak Nia oan.
Notísia Relevante: PNTL asegura ona autór ne’ebé soe bebé iha SMP2 Maliana
Relijioza hosi Kongregasaun Canosiana iha Timor-Leste, Madre Guilhermina Marçal, hateten soe bebé no abortu ne’e hanesan hasai ema ida-nia vida ka moris no hanesan aktu ida la konsidera no la valoriza moris.
Madre Guilhermina Marçal hateten, ema ne’ebé moris iha mundu ne’e nu’udar Maromak nia ilas no hanesan kriatura Maromak nian ne’ebé iha responsabilidade hodi kontinua hatutan misaun Maromak nian.
“Ita moris tanba Maromak nia projetu ida ba ita. Ita moris katak Nai Maromak fó misaun ida ita atu ita hatutan Nia misaun iha mundu. Labarik ida moris, la’ós tanba sira husu atu inan-aman kous sira, maibé labarik ida moris tanba akordu ida entre feto ho mane ida, la’ós asaltu seksuál,” Madre Guilhermina Marçal hateten kestaun ne’e ba Agência Tatoli nakait ho aktu ema soe bebé ne’ebé durante ne’e akontese beibeik iha Timor-Leste, iha Balide, kinta ne’e.
Aktu soe bebé ne’e hanesan falta respeitu ba sira-nia aan hanesan feto no mane ida no ema nu’udar imajen, retratu no lalatak no kriatura Maromak nian, ne’ebé lakon konsiénsia, valór prinsipiu morál ema fiar-na’in.
“Ema ne’ebé iha valór no folin liu iha kriasaun hotu-hotu Maromak nian. Maromak kria buat mesak furak no kmanek, maibe buat furak no kmanek ema feto no mane hanesan komuñaun Maromak Oan, Aman no Espíritu Santu,” nia dehan.
Tanba, nia dehan, liuhosi kompromisu, hahalok, responsabilidade no aseitasaun ba misaun Maromak nian atu sai inan-aman ba labarik kiik-oan ne’ebé nia kous ne’e, tanba relasaun feto no mane ida-nian, nune’e inan-aman tenke respeita vida ne’ebé Maromak saran iha sira-nia liman.
Tuir nia, feto ida soe bebé tanba tauk hateten sai (pronunsia) mane ne’ebé tenta nia kous bebé ne’e, tanba mane husik nia responsabilidade maibé loloos feto tenki brani pronunsia katak ho mane mak kous no mane ne’e lakohi ka halai lakon. Tuir lei, ida-ne’e aktu kriminál kontra labarik ida-ne’ebé laiha kbiit tanba inan-aman soe bebé.
Aktu soe bebé ne’e akontese tanba rona liu ezijénsia biolojika no isin nia hakarak maske konsiénsia hateten la loos, tanba se ema ida-idak rona ba iha ninia konsiénsia rasik mak sei la akontese isin-rua hodi soe bebé.
Dalaruma, nia dehan, ema dehan diabu mak tenta maibé ida-ne’e la loos, tanba ema ida-idak rasika mak sai diabu ne’ebé atrai ema-nia konsiénsia la hakamatek.
“Feto joven sira atu hatene katak inan nia knotak hanesan versu moris lulik Maromak nia liman fatin, labele hafoer versu lulik Maromak nia liman ne’e ho hahalok aat, Tanba, kous ne’e feto ho mane nia hakarak,” nia hateten.
Tanbe ne’e, madre ne’e husu ba feto sira katak tenke aproxima inan aman, autoridade lokál, se tauk bele aproxima igreja hanesan madre sira kona-ba problema ne’ebé feto foinsa’e sira enfrenta, la’ós dalan úniku mak hahoris tiha no soe bebé.
Tanba karik dezempregu no kestaun ekonomia mak obriga ema ida soe bebé, nia hatán, ekonomia bele buka liuhosi negosiu kiik maibé ida ne’e sentidu isin nian ne’ebe afeta povu, maibe ema timoroan lakohi atividade ho lukru kiik tanba Maromak fó kapasidade intelijénsia ba ema hotu atu jere nia moris rasik hodi hadi’a moris.
Relijioza ne’e hateten, inan-aman hosi feto kous tenke hatene sintoma ema kous, oan kuandu latama uma tenke buka no feto ka mane tenke iha koñesimentu relasaun seksuál nia impaktu. Ida-ne’e tuir igreja katólika liuhosi sakramentu matromóniu, hamrik iha igreja halo juramentu halo aliansa domin iha Maromak nia futar oin.
“Labarik sira presiza akompañamentu di’ak hosi idade zero (0) to’o otas 24, tanba ema dehan ida ne’e idade osan-mean. Presiza iha apoiu no edukasaun loloos. Ita presiza iha kooperasaun ida hosi inan-aman, manorin no sosiedade hotu hodi fó apoiu di’ak atu forma karáter ita-nia oan feto ka mane Timor-Leste nia oan ne’ebé metin. Labarik mak futuru ba ohin no aban nian,” nia esplika.
Papel inan-aman no igreja importante iha sosiedade
Pastor hosi igreja Protestante Hosana, Lourenço Soares, hateten inan-aman no igreja nia papel importante atu eduka nia sarani sira liuhosi hametin sira-nia fiar.
Nia hateten, soe bebé ne’e akontese tanba ranxu livre ne’ebé laiha limitasaun no tanba iha aspetu rua (2) ba ransu livre hanesan impaktu pozitu ba hakle’an koñesimentu no negativu buat ladi’ak hanesan falta fiar mak soe bebé iha fatin-fatin.
“Inan aman iha responsabilidade hodi eduka oan feto no mane iha uma no iha eskola responsabilidade manorin sira-nian hodi fiar aan metin no ba Maromak,” Pastor Lourenço Soares hateten ba Agecia Tatoli iha Bebora, sesta (29 fevereiru 2024) ne’e.
Dalaruma, nia dehan, ohin loron inan-aman mesak servisu hotu no menus fó atensaun ba nia oan sira, entaun oan sira la’o konforme sira-nia hakarak hanesan ba tasi tanba inan-aman lakontrola tanba inan-aman fila kalan.
Dalabrak, tuir nia, bainhira kalan sira-fila ba uma ne’e sira nunka hamutuk no han hamutuk iha meza, entaun komunikaaun entre inan-aman noa oan sira ne’e menus tebes.
Loloos papel inan-aman nian tenki kontrola no tenke fahe edukasaun moral no espirituál ba sira-nia oan sira, tanba edukasaun hahú hosi uma laran.
Tuir nia, aktu soe bebé ne’e krime ne’ebé kontra lei no kontra Nai Maromak nia ukun fuan sanulu (10), nu’udar sala boot kontra Maromak nia dutrina ne’ebé labele hetan perdaun no Maromak sei kastigu ema.
“Ne’e akontese tamba menus fiar ba Maromak, lakon esperansa kuandu hasoru problema, sente laiha solusaun, entaun soe bebé no tara aan. Menus morál no espirituál. Iha aspetu ida-ne’e, ita prontu atu asume responsabilidade ba buat ne’ebé ema ida-idak halo,” nia esplika.
Soe bebé, nia hateten, tanba moe ba nia inan-aman no subar aan ne’e signifika laiha kapasidade atu asume responsabilidade, entaun dalan ida mak soe nu’udar oho ema maibé bainhira iha morál no espirituál ne’e tenke asume responsabilidade ba ema hotu no ba Maromak.
Atualmente joven sira harii uma kain sedu maibé seidauk asume responsabilidade tanba liuhosi ransu livre harii familia, maibé seidauk servisu no osan laiha.
Saida mak igreja protestan halo hodi bele eduka joven sira, pastor ne’e hatán, sira iha atividade kultu sira-nian iha fim de semana hodi bele eduka sira ho liafuan biblika kona-ba morál no espirituál.
Feto-mane hamutuk hafoin simu sakrementu matrimóniu
Prezidente Konsellu Kuradór Fundasaun Mesjid Annur, Abdullah Said Sagran, hateten relijiaun hotuhotu iha nia regra hanesan musulmanu iha regra ida katak uniaun feto ho mane akontese hafoin iha sakramentu matrimóniu.
Abdullah Said Sagran hateten, Maromak kria ema mane ho feto atu hamutuk no iha jerasaun hahú hosi beiala sira hanesan Adão ho Eva to’o iha Timor-Leste.
Maromak kria feto ho mane atu dezenvolve aan hodi kaben, ida-ne’e laiha kriatura ida bele nega tanba frakeza umana ema halo aat, soe bebé hanesan atu iresponsavel tanba seidauk iha kompromisu ida hosi kazamentu legál hodi asume responsabilidade no viola regra fiar relijiaun nian.
“Iha relijiaun Islamiku kria feto ho mane iha sentimentu, maibé iha mós regra no norma atu sosiedade bele moris tuir. Kazamentu iha Islam ne’e forte tebe-tebes, la’ós hola malu nune’e de’it. Em jerál, ha’u hakrak hateten molok feto ka mane hamutuk, regra ida moris hamutuk mak kazamentu. Proibidu tebetebes, molok kaben ka Akad Nikah kazamentu sakrál ne’e mane ka feto labele hamutuk em sentidu de convivensia, tamba hetan kastigu boot iha mundu seluk,” Prezidente Konsellu Kuradór Fundasaun Mesjid Annur, Haji Abdullah Said Sagran, hateten ba Agência Tatoli iha Kampung Alor, sesta (29 fevereiru 2024) ne’e.
Kazamentu hanesan kompromisu ida, kna’ar inan-aman nian hodi entrega feto ba nia mane-foun hodi simu responsabilidade ne’e ida mak rekoñesimentu Maromak nian hodi bele moris hamutuk.
Tanba ne’e, nia husu ba ema sira-ne’ebé halo sala hanesan soe bebé hodi bele toma konsiénsia arrependimentu ba nia atitude perante sosiedade atu Maromak bele perdua.
“Ita-nia konsiénsia ne’e tenke ko’alia makaas katak sala duni. Ita tenke preokupa katak ita halo sala, aban bainrua sei hetan kastigu. Ita preokupa tebes husu perdaun. Ita tenke sente miserikordia Nai Maromak nian no perdua ita antes mate no husik mundu ne’e. Konfesa ita-nia sala ba Maromak,” nia dehan.
Tuir nia, relijiaun sai pontu prinsipál atu eduka moralmente ba nia ema kona-ba valór moris sosiedade tuir fiar relijiaun ida-idak nian.
Notísia Relevante: Uma Kreda lamenta ho inan soe bebé
Jornalista : Jesuína Xavier
Editór : Cancio Ximenes
