DILI, 06 marsu 2024 (TATOLI)–Veteranu Marcelino da Cunha “Teki” hateten, IX Governu Konstitusionál halo aditamentu ba artigu balun iha lei Kombatente Libertasaun Nasionál (KLN), atu nun’e menoridade sira-n’ebé uluk envolve iha funu ne’e bele hetan pensaun.
Notísia Relevante: Partisipasaun menoridade iha prosesu libertasaun sei rekoñese tuir lei kombatente
“Kona-ba vítima da guerra ne’e ami hato’o beibeik ba Governu hodi kria lei ba vítima da Guerra. Ami hato’o beibeik ona ba Governu hodi kria lei maibé to’o agora seidauk iha lei ida-ne’ebé fó dalan ba menoridade ka vítima da guerra sira hodi hetan direitu ba pensaun. Tanba ne’e Governu tenke hanoin ona hodi tau prioridade mós ba menoridade sira,” Veteranu Teki hateten ba Agência Tatoli, hafoin selebra loron Nasionál Veteranu ba dala-hitu (7) iha Palásiu Governu, domingu (03 marsu 2024) ne’e.
Nai dehan, ida-ne’e Estadu tenke haree no Governu presiza tau atensaun tanba ne’e kontribui ba libertasaun nasionál no hamtuk ho menroridade sira mak bele luta ba Timor-Leste independénsia ida-ne’e.
Sekretáriu Estadu Asuntu Kombatente Libertasaun Nasionál (SEAKLN), César dos Santos de Deus, hateten Ministériu Asuntu Kombatente Libertasaun Nasionál (MAKLN) daudaun ne’e halo hela diskusaun esbosu alterasaun ba estatutu kombatente libertasaun nasionál nian.
“Kona-ba alterasaun estatutu komabatente libertasaun nasionál ami agora halo hela konsultasaun ba membru Konsellu Munisipál sira hotu hodi aprezenta esbozu, no rona mós sira-nia hanoin foin foti alterasuan ba lei artigu komabatente libertasaun nasionál nian. Ida-ne’e sei ba aprezenta iha Konsellu Ministru no Parlamentu Nasionál mak foin hetan aprovasaun ba artigu sira-ne’e,” Sekretáriu Estadu Asuntu Kombatente Libertasaun Nasionál (SEAKLN), César dos Santos de Deus, hateten, iha Palásiu Governu Dili, tersa ne’e.
Nia hatutan, kona-ba artigu hira mak halo alterasaun seidauk iha desizaun klaru tanba ida-ne’e presiza iha konsultasaun di’ak mak foin foti desizaun.
“Hosi alterasaun artigu balun ne’e, ita seidauk bele ko’alia kona-ba kontribuisaun menoridade (labarik) ne’ebé envolve-aan iha funu ne’e, atu hetan pensaun ka lae. Tanba, ida ne’e aban bainrua ami sei haree polítika saida mak sei haree ba partisipasaun ne’e,” nia hateten.
Antes ne’e, iha loron 26 Janeiru 2024 Ministru “Oan Soru”, Sekretáriu Estadu Veteranu (SEV) César dos Santos da Silva “Merak” Prezidente Konsellu Administrasaun Nasionál (CCLN) Vidal de Jesus “Riak Leman” no hamutuk Kombatente Libertasaun Nasionál sira halo uluk ona diskusaun esbozu ba alterasaun ba estatutu kombatente libertasaun nasionál.
Nune’e, iha 31 janeiru 2024, Ministru Asuntu Kombatente Libertasaun Nasionál Gil da Costa ‘Oan Soru’ kontinua hala’o enkontru ho Eis-Prezidente Komisaun Homenajem, atuál Prezidente Autoridade Turizmu Timor-Leste, Virgilio Smith “Kranik”, no kontinua halo konsultasaun ho veteranu balun ne’ebé antes ne’e harii komisaun instaladora iha tinan 2019, halo diskusaun kle’an hafoin ba aprezenta iha Konsellu Ministru no sei lori ba Parlamentu Nasionál hodi hetan aprovasaun.
Notísia Relevante: RENETIL sujere halo aditamentu aumenta artigu iha lei kombatente kona-ba pensaun
Jornalista : Osória Marques
Editór : Cancio Ximenes
