VIQUEQUE, 11 Marsu 2024 (TATOLI)— Diretór Servisu Agrikultura Munisípiu Viqueque iha Ministériu Agrikultura Pekuária, Peska no Floresta (MAPPF), Juaquim Fernandes, informa distribui ona tratór boot hamutuk unidade haat mai munisípiu Viqueque.
” Ami simu ona tratór foun unidade haat hosi ministériu hodi reforsa tratór tuan sira atu fila komunidade nia rai hodi halo toos no natar hodibele hasa’e produsaun ai-han iha munisípiu Viqueque”, Joaquim Fernandes hateten ba Agência TATOLI,I.P, iha resintu administrativu Viqueque, ohin.
Daudaun, Diretór ne’e dehan ekipa tratorista sira halo teste ka (rodajen) molok responde ba pedidu povu agrikultór sira nian hodi fila rai.
Iha tinan 2022 to’o 2023, Servisu Agrikultura Munisípiu Viqueque simu pedidu hosi komunidade agrikultór sira hosi postu administrativu Uatulari, Viqueque Vila no Ossu atu fila rai etare 550, maibe labele responde tanba kondisaun tratór sira la sufisiente.
“Ita sei foku ba manutensaun ba tratór tuan sira hodi bele apoia tratór foun sira hodi responde ba pedidu hosi komunidade sira atu fila sira nia rai hodibele halo toos no natar,” nia garante.
Antes ne’e, ekipa mekániku sira hosi MAPPF halo ona verifikasaun no levantamentu dadus tratór boot sira iha munisipiu Viqueque. Tuir dadus daudaun iha tratór a‘at naton 14, a’at todan 12 no kondisaun di’ak haat.
Notísia relevante:Grupu agrikultór no peskadór iha Covalima simu tratór haat no ró neen husi MAPPF
Jornalista: Vitorino Lopes da Costa
Editór : Florencio Miranda Ximenes
