COVALIMA, 07 Abríl 2024 (TATOLI) – Prezidente Autoridade Munisípiu (PAM), Covalima, Miguel Armada Cardoso, husu ba populasaun-sira hasa’e produsaun nune’e labele dependénsia foos importasaun husi rai-li’ur.
“Ha’u seidauk haree irrigasaun no rai barak abandona barak, populasaun la aproveita, hodi halerik de’it ba Estadu ne’e sala. Inan-aman sira ita identifika rai ekatare 300 liuhusi Diretór Servisu Agrikultura atu fila hodi hasa’e produsaun,” nia ko’alia iha Covalima.
Líder munisípiu Covalima ne’e submete ona karta ba Ministériu Agrikultura, Pekuária , Peska no Floresta (MAPPF), atu fila populasaun nia rai hodi halai natar nune’e hasa’e produsaun iha munisípiu Covalima.
Autoridade Covalima ne’e koordena ona ho Sekretaria Estadu Kooperativa liuhusi MOKATIL atu kuda batar kairala nune’e populasaun-sira tenke halai natar, kuda batar, ai-farina no seluk tan iha Covalima.
Prezidente Autoridade Munísipiu Covalima ne’e subliña, ne’e nu’udar polítika hasa’e produsaun iha rai-laran.
Nune’e mós iha ona hanoin atu kria sentru lojístika munisipál, katak Estadu mak sosa fali agrikultór sira-nia produtu hodi fa’an fila fali ho nia presu ne’ebé karun nune’e motiva populasaun halai natar atu labele dependénsia importasaun foos mai husi nasionál.
Tuir dadus husi Servisu Munisipál Apoiu Organizasaun Naun-Governamentál no Organizasaun Komunitára, rejista populasan mai husi postu administrativu Fatululik, Fatumea, Fohorem, Tilomar, Maucatar, Suai no Zumalai hamutuk rihun 86.
Miguel Ribeiro nu’udar agrikultór reforsa, la’ós agrikultór sira baruk atu halai natar, maibé autoridade tenke kontrola irrigasaun Kay Rala ne’ebé distribui bee ba natar la sufisente ba agrikultór atu halai natar.
“Ita-boot sira kontrola irrigasaun ho di’ak hodi distribui bee ba natar hirak, ne’e ami mós prontu atu halai natar hodi hasa’e produsaun iha rai-laran, tanba dadaun ne’e rai barak kontinua abandona tanba agrikultór sira hasoru problema sira hanesan menus bee no la hadi’a irrigasaun,” agrikultór ne’e fó hanoin ba Governu.
Dadus prelimináriu iha tinan 2022 hatudu katak, ne’ebé agrikultór sira kolleta iha Covalima hamutuk 988,558 ne’ebé mai husi postu administrativu hitu.
Tuir dadus husi Servisu Munisipál Agrikultura Covalima iha tinan 2023, katak produsaun hare-kulit menus, tanba relasiona ho dezastre naturál entaun produsaun hare ektare 441, husi dadus ne’e iha postu Zumalai konsege estraga hare ektare 251.
Jornalista: Celestina Teles
Editór: Evaristo Soares Martins
