COVALIMA, 12 Abríl 2024 (TATOLI) – Servisu Munisipál Seguransa Alimentár (SMSA) la konsege implementa Planu Asaun Anuál (PAA) ne’ebé trasa ona ba trimestre dahuluk tanba Prezidente Autoridade Munisípiu Covalima, Miguel Armada Cardoso, foin mak simu pose iha Marsu.
Diretór SMSA, Hilário Oliveira Mendonça, esplika katak PAA ba fulan-janeiru no marsu ne’ebé la konsege realiza mak halo monitorizasaun ba armazenamentu merenda eskolár ne’ebe daudaun seidauk implementa, halo teste ba bee posu ne’ebé populasaun sira atu konsumu no disemina informasaun sobre seguransa alimentár ba populasaun iha postu administrativu sira.
“Ami simu pose iha loron 06 Fevereiru hodi hein prezidente autoridade munisípiu ne’ebé pose iha Marsu. Ami atu submete pedidu maibé sei hein PAM. Daudaun ne’e, pedidu prosesu ona bainhira PAM aprova mak foin bele hala’o atividade iha Planu Asaun Anuál”, Hilário Mendonça dehan iha Bairru Costa.
Maski lakonsege implementa programa ne’e iha trimeste dahuluk, responsavel ne’e promete katak sei implementa iha trimestere daruak, tanba pedidu ne’ebé mak SMSA submete ba PAM hein de’it aprovasaun.
Diretór Servisu Munisipál ba Asaun Sosiál, Clementino Bere, admite katak SMAS la konsege implementa PAA, tanba hein aprovasaun proposta husi PAM hodi implementa programa, sub programa no atividade sira.
Orsamentu ba Servisu Munisipál Asaun Sosiál hamutuk $ 59.557 hodi hala’o programa inkluzasaun sosiál ne’ebé hala’o atividade serbisu funeráriu, halo fiskalizasaun atividade instituisaun sosilidariedade, apoiu nesesidade edukativa ba motorista no halo sensibilizasaun informasaun kona-ba violénsia doméstika.
Orsamentu 2024 ba Covalima hamutuk millaun $7,3 ne’ebé aloka ba saláriu no vensimentu millaun $2,3, bens no servisu $846.885, transferénsia públika millaun $2,6, kapitál menór $166.820 no kapitál dezenvolvimentu millaun $1,4.
Verba sira ne’e atu finansia programa 13, sub-programa 31 ho atividade 74, tuir planu asaun anuál ne’ebé aprezenta husi kada diresaun servisu munisipál sira.
Notísia relevante: Presiza aselera implementasaun projetu ualu iha Covalima
Jornalista: Celestina Teles
Editora: Maria Auxiliadora
