COVALIMA, 16 Abríl 2024 (TATOLI) – Servisu Emerjénsia Médika Covalima (SEMC) transfere, entre Janeiru no Marsu 2024, pasiente 52 bá Ospitál Nasionál Guido Valadares (HNGV, sigla portugés). Pasiente sira ne’e sofre moras anemia severa, ho trauma, bebé moris prematura no denge.
Xefe Departamentu Servisu Emerjénsia Médika Covalima, Vitorino Sequeira Magno, esplika katak pasiente sira ne’e transfere bá ho ambulásia 22 no ho aviaun 30.
“Ita sempre transfere pasiente bá iha nasionál tanba laiha espesialista ba internista, espesialista iha neonatolojia, no mákina raiu-xís mós avaria hela atu pasiente balun presija halo CT-SCAN no la ita laiha ekipamentu balun”, Vitorino Magno informa iha Bairru Costa, ohin.
Tanba ne’e nia husu atu aumenta espesialista sira iha Ospitál Referál Suai no presiza halo manutensaun ba ekipamentu no sosa makina raiu-xís no inkubadora ba bebe foin moris ho prematura no seluk tan.
Diretór-Ezekutivu Ospitál Referál Suai, Geraldo Francisco da Cruz, hateten razaun halo transferénsia ba pasiente sira tanba presiza halo ezame komplementár iha HNG.
Dirijente ne’e salienta katak atu hamenus númeru transferénsia pasiente bá HNGV maka presiza iha mákina CT-SCAN no ekipamentu seluk atu apoia serbisu. Ospitál Suai ne’e daudaun iha médiku timoroan na’in-rua no kubanu lima.
Jornalista: Celestina Teles
Editora: Maria Auxiliadora
