OÉ-CUSSE, 18 Abríl 2024 (TATOLI) – Ministériu Edukasaun, liuhusi Sekretaria Estadu Ensinu Sekundáriu Jerál no Ensinu Tékniku Vokasionál disponibiliza mobiliáriu eskolár, komputadór, no drum band ba eskola tolu iha Oé-Cusse.
“Ita la’ós apoia mak dala ida-ne’e de’it ona, maibé iha kontinuasaun. Iha nesesidade ne’ebé persiza duni atu tulun, ita tenke apoia ba eskola sira iha territóriu, maibé ho fazeadamente”, Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lopes Lemos, dehan.
Governante ne’e informa katak drum band ne’e entrega ba Eskola Sekundária Públika Palaban, meza no kadeira unidade 150 ba Eskola Sentru Aprendizajen no Formasaun Eskolár (CAFE, sigla portugés) Palaban no meza-kadeira ho kuantidade hanesan ba Eskola Sekundária Katólika Nossa Senhora de Fátima Padiae.
Notísia relevante:Dom Virgílio Cardeal inaugura Eskola Sekundáriu Katólika Padiae Oé-Cusse
Sekretáriu Rejionál ba Asuntu Edukasaun no Solidariedade Sosiál, Inácia Tamele, konsidera katak ekipamentu sira ne’e tulun tebes eskola sira iha Oé-Cusse, tanba planu no orsamentu ne’ebé ezekuta daudaun ne’e planeadu hosi Governu anteriór.
Nune’e, Servisu Edukasaun Oé-Cusse kontinua esforsu hodi rekolla dadus husi pré-eskolár to’o ensinu sekundáriu atu orsamenta iha 2025.
“Sasán sira ne’e tulun tebes ami no hamenus ona proposta hirak-ne’ebé durante ne’e eskola sira hato’o mai ami atu rezolve”, nia salienta.
Iha sorin seluk, Diretór Eskola Sekundária Katólika Nossa Senhora de Fátima Padiae, Padre Carlos de Deus, agradese ba Governu, tanba disponibiliza ona materiál ba eskolá katólika nu’udar privada atu enkoraja estudante sira iha vida morál, espirituál no intelektuál.
Saserdote ne’e realsa katak eskola sekundária ne’e iha alunu hamutuk 90 no iha profesór na’in-neen ne’ebé hanorin iha eskola ne’e.
“Ami sei toma responsabilidade ba sasán sira-ne’e, ba estudante sira-nia nesesidade atu aprende. Iha futuru sira remata karik bele hatene uitoan komputadór sira. Iha ne’e labarik barak tebes, sei fahe ekipa, tanba eskola iha komputadór haat, maibé Governu apoia tan ualu, hamutuk unidade 12 ona”, nia relata.
Notísia relevante: Rogeriu Lobato identifika CAFE Oe-Cusse enfrenta promblema bee-moos no laiha kampu desportiva
Jornalista: Abílio Elo Nini
Editora: Maria Auxiliadora
