OÉ-CUSSE, 10 janeiru 2024 (TATOLI) – Dom Virgílio Cardeal do Carmo da Sílva, SDB, kuarta ne’e, inaugura Eskola Sekundáriu Katólika Nosa Senhora de Fátima Padiae iha suku Lalisuk, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA).
“Hodi Arkedioseze no Igreja konferénsia episkopál Timor-Leste nia naran, hakarak agradese ita-nia Governu RDTL, ne’ebé liuhosi subsídiu fó ba iha konferénsia episkopál, ida-ne’ebé monu iha diocese Dili maka hodi realiza konstrusaun ida-ne’e, tan ne’e, osan ne’ebé kuandu igreja simu ne’e uza mós atu harii eskola,” Dom Virgílio Cardeal do Carmo da Silva, SDB, ko’alia iha ámbitu ianugurasaun ne’e.
Notísia relevante: Dom Virgílio inaugura EBC Santu António RAEOA
Dirijente Igreja Katólika Timor-Leste ne’e, agradese tanba konstrusaun foun ne’ebé harii mai hosi orsamentu ne’ebé Governu fó, tanba tuir konkordata 50% hosi subsídiu ne’ebé fó ne’e destinadu servisu edukasaun ninian.
“Tan ne’e, agradese mós ba Governu liuhosi Ministériu Edukasaun, nia kompromisu no promete atu fó apoia tanba eskola ne’e, foin maka hahú, atu hahú laiha dúvida la’os de’it, presiza edifísiu, maibé ita haree iha laran, seidauk iha mobiliáriu inklui menus profesór.”
Nune’e, parte Igreja Katólika sei servisu hamutuk ho Governu, bele tulun atu hadi’a kondisaun, tanba kualidade edukasaun la’ós depende de’it ba iha uma, maibé kondisaun hotu, ne’ebé nesesáriu nune’e bele garante kualidade edukasaun ne’ebé di’ak.
Dom Virgílio Cardeal do Carmo da Silva, fó hanoin ba autoridade lokál sira iha suku Lalisuk, inan-aman atu servisu hamutuk ho profesór no padre sira, atu tau matan eksola fou ne’e, presiza responsabilidade no kolaborasaun nune’e eskola ne’e di’ak nafatin ba jerasaun tuir mai.
Iha fatin hanesan, Koordenadór Eskola Sekundáriu Katólika Nossa Senhora de Fátima Padiae, Hercolano Cofin, orgullu tanba ne’e oportunidade ba oan no bei-oan sira, atu-bele asesu edukasaun ensinu sekundáriu besik.
“Ami agradese tanba sei lahanesan uluk, tenki la’o do’ok kuaze kilómetru 10 ba Oé-Cusse vila mak bele kontinua estudu iha nível sekundáriu, maibé agora di’ak ona, ami nu’udar profesór mós kontente tanbanalunu sira-ne’ebé akaba hosi terseiru siklu sei kontinua de’it iha ne’e,” nia agradese.
Tuir nia, eskola sekundáriu Katólika ne’e mak hahú nia prosesu ensinu aprendizajen iha 2024 hahú ho klase désimu primeiru, no daudaun ne’e rejista ona estudante hamutuk na’in-86 komposta hosi mane 48 no feto 38.
Kona-bá mobiliáriu kadeira no meza, daudaun ne’e prepara ona 100, atu koloka ba sala tolu, kona-bá profesór sei deside iha enkontru hamutuk ho padre sira, no iha posibilidade sei kolabora ho edukasaun rejionál, atubele koloka profesór permanente balu.
Notísia relevante:Estudante EBC Padiae realiza limpeza iha parókia nu’udar peniténsia molok tama Páskua
Entretantu, konstrusaun Eskola Sekundáriu Katólika Nosa Senhora de Fátima Padiae ne’e, konstrui hosi kompañia Oé-Japa Unipesoál Lda, ho valór kontratu hamutuk $128,485.78 no konstrusaun ne’e hahú ezekuta iha fulan novembru 2023.
Jornalista: Abílio Elo Nini
Editór: Evaristo Soares Martins
