DILI, 06 maiu 2024 (TATOLI) – Avansadu husi klube Zhavia FC, Samuel da Cruz (11), susesu salva nia ekipa husi lakon bainhira kontra ekipa Pilatus Buruma FC iha jogu kontinuasaun kopa Maun Boot Kay Rala Xanana Gusmão ne’ebé realiza iha Estádiu Munisipál Dili, segunda ne’e.
Bainhira jogu hahú ekipa rua lansa kedan kontra no atake ba malu tuir tékniku no abilidade jogadór sira iha. Sira duni hadau malu bola ho objetivu ida atu manán jogu bainhira prodús golu.
Notísia relevante:Kopa Xanana ho vizaun promove joven sira nia talentu
Ekipa Zhavia lansa kontra no atake ne’ebé másimu, maibé jogadó Pilatus tenta hamate tutuir, halo Zhavia book-aan susar atu domina bola iha kampo laran.
Jogu rua sai rame liutan bainhira hetan atensaun másimu husu adeptu sira ne’ebé tu’ur haleu tribun leten hodi hakilar ho lian makas fó suporta ho másimu, maske kosar barak sai maibé jogadór sira la sente kole, nafatin luta ho objetivu ida tenke hatama golu.
Ekipa rua hala’o jogu ofensivu, barani joga loke nune’e bele hetan oportunidade lais hatama golu. Maibé ekipa Pilatus esforsu ne’ebé makas ho sakrifisiu ikus iha minutu 22, jogadór Abrão da Silva (27) konsege hetan oportunidade hatama golu ba rede Zhavia nian hodi muda rezultadu eskore 1-0.
Jogu sai manas liutan, Zhavia la nonok tenta ho maneira oioin atu halo empata jogu , maibé la konsege tanba Pilatus halo falla tiha atake hirak ne’ebé Zhavia lansa.
Ho nune’e, to’o minutu primeira parte nian termina laiha tan golu ida mak akontese, Pilatus provizoriu lidera jogu ho golu 1-0.
Haka’at ba segunda parte, ekipa rua nafatin lansa kontra no atake ba malu, ho ritmu jogu ne’ebé aas. Zhavia buka meiu oioin atu hatama golu nune’e halo empata jogu. Pilatus esforsu maka’As atu aumenta tan golu maibé tarjetu ekipa rua nian seidauk kona iha alvu.
Maibé armada Zhavia iha ambisaun maka’as halo esforsu oioin. Maibé esforsu hirak ne’e la hela de’it hanesan esforsu tanba iha minutu 60 jogadór Gabriel Pires (21) hala’o jogu ho individu pasa kedan ho kalma ba jogadór Samuel da Cruz (11) konsege responde duni golu ida muda rezultadu ba 1-1.
Husi rezultadu ne’e halo Pilatus tenke servisu makas liutan, maibé Zhavia mós la fó valda, nune’e to’o minutu jogu termina laiha tan golu ruma mak akontese ba ekipa rua no ekipa rua tenke termina ho rezultadu ne’ebé hanesan 1-1.
Notísia relevante:Fitun Ramelau konkista vitória dala uluk iha Kopa Xanana
Jornalista: Hortencio Sanchez
Editór : Florencio Miranda Ximenes
