BAUCAU, 16 maiu 2024 (TATOLI) – Autoridade Administrasaun Munisipál Baucau husu abitante ne’ebé okupa espasu públiku atu koopera ho Governu nune’e futuru halo dezenvolvimentu iha munsípiu Baucau.
Prezidente Autoridade Munisipál (PAM) Baucau, Veneranda Eurico Marques Lemos Martins, esplika, despeju administrativu fó-sai hodi hamamuk espasu públiku atu prepara ba prosesu implementasaun desentralizasaun administrativa no podér lokál iha tempu besik, hanesan kria kondisaun infraestrutura.
“Ha’u husu kedas Baucau oan hotu koopera ho Estadu, tanba ida-ne’e ita foin hahú, maibé ita sei kontinua nafatin atu hadi’a sidade urbana, tenke haloot ho didi’ak,” Prezidente Autoridade Munisipiu (PAM) Baucau, ko’alia iha Baucau, kinta ne’e.
Autoridade Baucau agradese ba Sekretaria Estadu Asuntu Toponímia no Organizasaun Urbana (SEATOU) inklui ekipa liña ministeriál hotu relasiona ho prezensa iha Baucau liugadu ho ezekusaun uma tolu iha suku Bucoli inklui sei kontinua iha Baucau Vila.
Eis Deputada ne’e simu ona orientasaun husi Primeiru Ministru liuhusi Ministériu Administrasaun Estatál (MAE), atu indentifika Baucau oan hotu ne’ebé iha abilidade hodi halo preparasaun másimu liután.
“Sira-ne’ebé agora okupa espasu públiku hanesan dalan Estadu iha trotoar no dalan-ninin, sira koopera ba ajuda lori ita-nia rai ba oin, ita halo ita-nia kapitál ne’e sai furak atu ema hatene Baucau ne’e furak,” Veneranda akresenta.
Notísia relevante: Ekipa SEATOU halo despeju administrativu ba uma tolu iha Bucoli
Mário da Silva nu’udar komunidade ne’ebé hetan eviksaun sente triste, tanba Governu uza forsa hodi hasai obrigatóriu.
“Laiha, sira la fo ganti rugi ba ami-nia sasán, tanba ami la’ós fa’an ami-nia rai ba sé de’it,” Mário da Silva hateten.
Uma-kain tolu refereda iha área aldeia Makacada’e de Baixo komposta hosi Mário Cidalia da Silva, José da Silva no Agostinho da Silva ne’ebé okupa rai referda tanba konsidera nu’udar na’in ba rai, maibe tuir istória rai ne’ebé ohin hamamuk uluk entrega ba estadu hodi harii sentru Bucoli no ikus mai sai fatin sentru Pilotu númeru II ne’ebé lideradu Saudozu Vicenti Reis ‘Sahe’.
Entretantu tuir planu hafoin rai referida hamamuk sei sai fatin hodi halo restu mortál Saudozu Sahe no sai fatin sítiu turístika ne’ebé governu anteriór antes ne’e prevee ona orsamentu hamutuk $160.000.
Antes ne’e, Autoridade Baucau liuhusi Administrasaun postu Baucau Vila distribui karta notifikasaun komunidade ne’ebè hela iha uma estadu hamutuk 20 , no sei kontinua fó-sai tan karta notifikasaun ba komunidade sira-ne’ebé okupa espasu publiku hanesan kioske, loja no bengkel.
Notísia relevante: Autoridade Baucau sei notifika abitante ne’ebé okupa rai no uma Estadu
Jornalista : Natalino Belo
Editór : Evaristo Soares Martins
