iklan

BAUCAU, HEADLINE, MUNISÍPIU

Autoridade Baucau sei notifika abitante ne’ebé okupa rai no uma Estadu

Autoridade Baucau sei notifika abitante ne’ebé okupa rai no uma Estadu

Administradór Postu Administrativu Baucau Vila, Aires de Fátima Correia. Imajen Agência TATOLI/Natalino Belo.

BAUCAU, 07 maiu 2024 (TATOLI) – Autoridade Baucau liuhusi Administrasaun Postu Administrativu sei notifika komunidade sira-ne’ebè utiliza uma estadu iha Baucau Vila.

Administradór Postu Administrativu Baucau Vila, Aires de Fátima Correia, esplika, karta notifikasaun parte autoridade postu prepara ona hafoin simu orientasaun liuhusi enkontru ba levantamentu dadus rai no uma estadu iha munisípiu Baucau liuliu okupa hosi komunidade iha Baucau Vila.

“Notifikasaun iha tiha ona, hein atu halao de’it ona kona-ba rai no uma estadu nian,” Administradór Postu Administrativu Baucau Vila hateten iha Vila Antiga, tersa ne’e.

Konteúdu husi karta notifikasaun refere, Governu hakarak halo identifikasaun loloos ba rai privadu no estadu, tanba futuru fasil ba Governu bainhira iha planu atu halo dezenvolvimentu labele mosu dezentendimentu.

Karta notifikasaun referida seidauk distribui tanba sei hein ekipa levantamentu dadus ba uma no edifísiu estadu nian, inklui ekipa prelimináriu ne’ebé sei iha hela terrenu tanba sei halo identifikasaun.

“Administradór Postu ho Xefe Suku koopera ho Polísia, la’ós atu sobu maibé fó espasu ba estadu hodi bo’ok aan,” Aires Correia akresenta.

Xefi Suku Tirilolo, Elvino Freitas Belo, hateten, uma estadu hosi okupasaun Portugés no Indonézia iha área Tirilolo balun abandonadu no balun okupa husi komunidade inklui iha uma balun utiliza ba edifísiu públiku.

“Ita hotu koopera, maibé tenke hanoin, saida mak sira atu ko’alia hela ba komunidade, tanba-ne’e hakarak rekomenda ba Governu halo uluk sosializasaun ba komunidade sira molok hasai,” Elvino Belo rekomenda.

Elvino Belo husu Governu kria kondisaun ba komunidade sira tanba balun laiha forsa atu konstrui uma, nunee Governu atu uma hirak-ne’e hodi uza fali ba nesesidade Nasaun nian.

Autoridade postu Baucau Vila prepara ona karta notifikasaun hamutuk 20, ne’ebé sei distribui ba suku rua, hanesan suku Bahu no Tirilolo.

Jornalista   : Natalino Belo 

Editór         : Evaristo Soares Martins 

iklan
iklan

Leave a Reply

iklan
error: Content is protected !!