DILI, 16 maiu 2024 (TATOLI) – Xefe Ezekutivu Even2u Luis Simoes, hateten artista Calema konfirma ona katak aban to’o ona Timor-Leste ho Aero Dili.
“Horsida lokraik artista Calema to’o iha Bali Indonézia, aban kontinua viajen mai Timor-Leste ho aviaun Aero Dili to’o iha Aeroportu Internasionál Nicolau Lobato ho oras 13:30”, Luis Simoes informa ba TATOLI liuhosi Whathsap, ohin.
Nia dehan, artista Calema sei deskansa iha Hotel Timor, iha tuku 15:30, Even2u hamutuk ho artista Calema sei halo konferénsia imprensa iha Timor Plaza hodi koalia kona-ba atividade sira ne’ebé Calema atu halo iha TL.
“Aban sira mai, sira deskansa iha Hotel Timor, depois lokraik tuku 15 :30 ami hamutuk sei halo konferénsia imprensa iha Timor Plaza, lantai 5 kona-ba atividade sira ne’ebé atu halo iha Timor-Leste ne’e”, nia esplika.
Nia haktuir, Calema nia estadia iha Timor-Leste sei hasoru malu ho Primeiru-Ministru, Prezidente Repúblika no mós sei halo sira-nia video clip iha Timor Leste.
“Sira hela iha ne’e durante loron lima no sira mós sei ba hasoru Primeiru-Ministru Kay Rala Xanana Gusmão no mós Prezidente Republika José Ramos Horta no sira sei ba área ne’ebé mak besik halo sira-nia video Clip”, nia konklui.
Jornalista : Felicidade Ximenes
Editór : Zezito Silva
