DILI, 17 maiu 2024 (TATOLI)—Ministériu Edukasaun (ME) liuhusi Diresaun Rekursu Umanu halo hela verifikasaun dadus subsídiu transporte ba kargu xefia hamutuk 2.000-resin husi eskola.
“Subsídiu transporte ba kargu xefia sira sei kontinua halo verifikasaun, ne’e tenke haree didi’ak, ne’e duni ami seidauk haruka ba finansa. Iha profesór kuaze 2.000-resin tanba dadus sira balun agora prosesu troka hela, ne’e duni pagamentu subsídiu transporte ba sira seidauk hala’o. Pagamentu ne’e ita labele halo agora, tanba ne’e retro de’it ona, ita normaliza de’it sira-nia saláriu,” Diretora Rekursu Umanu ME, Anita Tavares Ribeiro de Jesus, informa, iha ninia knaar fatin, Vila Verde, sesta ne’e.
Notísia relevante : ME finaliza ona pagamentu subsídiu transporte ba profesór hamutuk 14.239
Iha fatin seluk, Adjuntu Direitór Eskola Ensinu Sekundáriu Jerál (ESJ) 04 de Setembru Balide, Alexandre da Costa Belo, dehan, subsídiu ba kargu xefia sira no diretiva eskola la’o hanesan baibain.
“Ema la asume kargu hetan subsídiu $25, tanba subsídiu transporte ba kargu xefia ne’e diferente maibé to’o agora Governu liuhusi Ministériu Edukasaun fó de’it $25 no saláriu ba kargu xefia sira tinan-ida resin ona mós hanesan de’it,” nia akresenta.
Enkuantu, ema la asume kargu hetan subsídiu $25, tanba subsídiu transporte ba kargu xefia ne’e diferente.
“Maibé ami to’o agora Governu liuhusi Ministériu fó de’it $25 no saláriu ba kargu xefia sira tinan-ida resin ona mós hanesan de’it,” nia tenik.
Nune’e mós, Direitora Eskola Ensinu Báziku Sentrál (EBC, sigla portugés) Farol, Filomena Fátima Belo Freitas, hateten, subsídiu transporte ba kargu xefia iha eskola ne’e to’o agora seidauk no sira seidauk hatama dokumentu ba ME tanba antes ne’e simu ona $25.
Jornalista : Osória Marques
Editora : Julia Chatarina
