DILI, 27 dezembru 2023 (TATOLI) – Ministériu Edukasaun (ME) finaliza ona pagamentu subsídiu transporte ba profesór hamutuk 14.239 iha territóriu nasionál inklui dirijente ka kargu xefia ho montante $25 kada fulan hahú husi juñu-novembru 2023.
Diretora Nasionál Rekursu Umanu Ministériu Edukasaun, Anita Tavares Ribeiro de Jesus, hateten pagamentu subsídiu transporte ba profesór sira finalizadu ona, hela de’it zero pursentu ne’ebé mak iha hela faze hadi’a dadus hamutuk ho Ministériu Finansa. Sira ne’ebé seidauk hetan direitu ne’e bele dehan maizumenus hela na’in ida ka rua de’it hanesan ne’e.
“Pagamentu subsídiu transporte ne’e ha’u bele dehan katak nia prosesu finalizadu ona. Ita konta persentajen ne’e zero pursentu de’it ona, maizumenus iha ida ka rua de’it mak seidauk tanba sira-nia dokumentu seidauk kompletu,” Anita ba Tatoli iha ninia servisu fatin, ME, Vila Verde, kuarta ne’e.
Nia hatutan Ministériu Finansa daudaun ne’e kontinua haree hela iha sistema sira hodi verifika ho didi’ak dokumentu profesór sira ne’ebé seidauk hetan direitu ba subsídiu transporte ne’e tama ona iha sistema ka lae. Kuandu seidauk sira tenke kompleta.
Tuir nia katak agora daudaun prosesu pagamentu ba profesór sira iha territóriu nasionál ne’e sei hahú uluk ho $25, vale mós ba profesór sira ne’ebé mak asumi kargu hanesan diretór, adjuntu diretór, koordenadór inklui Xefe Gabinete Apoiu Tékniku (GAT), depois bá tinan oin mak sei hala’o fali prosesu foun entaun sei paga la hanesan ona.
Husi dadus profesór hamutuk 14.239 ne’ebé hetan direitu ba susbsídiu transporte durante fulan neen ne’e, Anita informa, husi inísiu kuandu parte Rekursu Umanu submete sira-nia dadus ba Ministériu Finansa iha profesór na’in 600 mak laiha númeriu peiról no iha na’in 127 mak sistema finansa la detetadu, maibé ho esforsu ne’ebé ME liuhusi Rekursu Umanu halo, daudaun ne’e iha de’it zero pursentu mak sira-nia dadus sei prosesa hela.
Entretantu, subsídiu ne’ebé Ministériu Edukasaun prevee hodi selu transporte ba profesór rihun 14-resin ne’e hamutuk millaun $2,1. Pagamentu subsídiu transporte ba profesor sira-ne’e tuir esforsu ME ninia tenke finaliza iha fulan dezembru ne’e nune’e bainhira kontinua fali iha tinan oin ninia pagamentu la hanesan ona.
Jornalista: Tomé Amado
Editór: Rafael Ximenes de A. Belo
