OÉ-CUSSE, 18 maiu 2024 (TATOLI) – Primeiru Ministru, Kay Rala Xanana Gusmão, husu Autoridade Rejiaun Administrativa Espsiál Oé-Cusse Ambeno (RAEOA), lideradu Rogério Tiago Lobato no ekipa Zona Ekonómia Espesiál Dezenvolvimentu Oé-Cusse Ambeno (ZEEDOA), atu jere Orsamentu Jerál Estadu (OJE) nian ho di’ak tanba osan ne’e povu nian.
“Agora ita iha situasaun ida di’ak tebes, tanba ita iha osan rasik, maibé osan povu nian, jere ho di’ak, ida-ne’e mak sei ejize nafatin ba Prezidente RAEOA no ba imi hotu ne’ebé serbisu iha-ne’e, osan povu nian jere ho di’ak, ita sei halo auditoria husi RAEOA ba to’o rai boot hodi kurrije kedas,” Xanana Gusmão, hato’o nia apelu ne’e iha Aeroportu Oé-Cusse, sábadu ohin.
“Iha ne’e, imi na’in rua Prezidente Autoridade RAEOA ho ZEEDOA João Gonçalves, serbisu hamutuk ho hanoin ida, imi sei hetan ami-nia apoia tomak, oinsá dezenvolve rai ida-ne’e, oinsá ita entrega ba Atoni nia oan sira responsabilidade la’ós de’it iha liman liu-liu iha ulun,” nia husu.
Notísia relevante: Primeiru Ministru promete auditoria Aviaun ZEESM no Roo Haksolok
Xefe Governu mós husu ba Autoridade RAEOA, atu kontinua kapasita Atoni-oan sira ba hasai kursu espesialidade iha área finansa, administrasaun, planeiamentu, enjeñeiru, agrikultura peska, pekuária no turizmu.
Lidér Karízmatiku ne’e, relembra, iha tinan hirak kotuk, hala’o vizita iha Tasi-Tolu Dili tanba akontese inundasaun, haree Atoni-oan barak mak buka moris iha Dili no lakohi fila ba Oé-Cusse tanba serbisu laiha.
“Tan ne’e Prezidente Autoridade ho ZEEDOA haree ida-ne’e, kria kampu traballu ba Oé-Cusse oan sira,” nia husu.
Primeiru Ministru, hateten, iha IX Governu rona Oé-Cusse apezár nia estatutu tuir konstituisaun la’ós fatin ida ketak husi RDTL, ho ida-ne’e maka Estadu Timor-Leste mós tau matan mai to’o rai ketan Oé-Cusse Ambeno, rona mós povu Atoni sira-nia halerik, hodi forma autoridade foun hodi kumpre nia devér atu serbí rai Atone ho povu Atoni hodi kompleta serbisu ne’ebé hala’o karik, hala’o daudaun iha rai boot ne’ebá.
“Iha ita-nia vida dalaruma ita monu, ita monu ain mak kanek no naksalak karik, ka monu ulun fatuk baku iha fatuk ruma karik, importante ita halo tratamentu, hamriik fila-fali kontinua serbisu, ida-ne’e mak ha’u husu ba ema hotu atu kontribui,” xefe Governu husu.
Notísia relevante: OJE 2024, RAEOA seidauk ezekuta kapitál menór no kapitál dezenvolvimentu
Jornalista: Abílio Elo Nini
Editór: Evaristo Soares Martins
