BOBONARO, 28 maiu 2024 (TATOLI)-Komunidade sira iha suku Molop, postu administrativu Bobonaro, munisípiu Bobonaro difisil tebes atu asesu ba bee-moos iha tempu bailoro tanba debitu bee iha bee-matan ezistente menus.
Xefe suku Molop, António Maia, informa, iha tempu udan bee sufisiente atu fornese ba komunidade sira hotu, maibé tempu bailoro sudar tebes.
Notisia relevante: AMB hahú konstrui postu saúde Molop no reabilita estrada Mazop
“Ami-nia preokupasaun mak bee ne’e, iha tempu bailoro bee menus, komunidade balu hetan, barak liu mak la hetan tanba bee lato’o, ne’ebé ami husu ba Governu se bele tau matan mai ami-nia suku Molop, buka alternativu seluk hodi bele rezolve problema ne’e, tanba tempu bailoro hanesan ne’e araska loos,” nia informa ba Tatoli iha Bobonaro, tersa ne’e.
Nia dehan, problema debitu bee-menus ne’e akontese iha aldeia sira hanesan Omelai, Molop-Taz, tanba aldeia rua ne’e jeografikamente iha liu foho lolon,bnune’e iha tempu bailoro obrigatóriu tenke la’o-ain ho distánsia metru 400 liu hodi ba buka bee-matan.
“Ita tenke buka, dook mós ba de’it ona, ita la buka atu halo nusá tán, tanba dook husi mota ne’e, entaun tempu bailoro bee-maran, dalaruma dadeersan madrugada de’it hadeer ba hadau malu bee,” nia hateten.
Enkuantu ba aldeia sira seluk hanesan Lonlolo ho Anapal, tempu bailoro komunidade sira kuru de’it bee-mota hodi utiliza ba nesesidade báziku no sanitária ba estudante sira.
“Iha aldeia ida Anapal ne’e mak konta la uza loos de’it, uluk iha ONG ida mak furak bee iha ne’ebá, agora mákina bomba ne’e ladi’ak ona, sira la uza, agora ba kuru fali bee iha mota, ha’u-nia planu atu tau iha projetu PNDS nian, maibé sei hein hela tanba foin lalais UNDP mai survey fali, maibé to’o agora seidauk rona rezultadu,” nia dehan.
Enkuantu tuir dadus monografia suku tinan 2024 katak, populasaun Molop hamutuk 1,826 ho totál uma-kain 407.
Notísia relevante: Komunidade husu MOP konstrui ponte iha Molop no mota Laku
Jornalista: Sérgio da Cruz
Editór: Evaristo Soares Martins
