DILI, 30 maiu 2024 (TATOLI)– Ekipa istimadu husi Munisípiu Viqueque Warikoan FC susesu hadau pontu tolu husi adversáriu Bairo da Paz FC bainhira manán ho golu 4-1, iha jogu kontinuasaun faze grupu kopa Maun Boot Kay Rala Xanana Gusmão ne’ebé realiza iha Estádiu Munisipál Dili, kinta lokoraik ne’e.
Bainhira jogu la’o ekipa rua lansa kedan kontra no atake ba malu tuir tékniku no abiliade ekipa ida idak nian.
Warikoan ho seriedade hakarak manán jogu ne’e, nune’e jogadór sira lansa presaun maka’as hasoru Bairo da Paz. Bairo da Paz mós la nonok tenta responde atake hirak ne’ebé Warikoan halo, nune’e jogu sai manas liutan.
Adeptus husi klube rua okupa tribun Estádiu nian hodi halo rame liutan jogu ne’e, sira hakilar ho lian maka’as fó suporta másimu ba ekipa favoritu.
Ho esforsu ne’ebé Warikoan iha, minutu 10 bola barullu iha lina oin Bairo da Paz nian jogadór Nencio de Jesus (7) , lansa ona golu hodu muda rezultadu ba 1-0. Jogu la’o manas liutan, Bairo da Paz la nonok koko hatudu jogu bonitu maibé Warikoan hamate ho kalma, ikus Bairo da Paz susar halo golu.
Liu de’it minutu 10 iha minutu 20 jogadór Nencio de Jesus lansa tan golu ida muda rezultadu ba 2-0, golu ne’e loke liutan adeptu Warikoan nia ibun hodi hakilar ho lian maka’as. Adeptus Bairo da Paz nian tur nonok hodi asiste laiha lian.
Haree ba presaun ne’ebé maka’as husi Warikoan Bairo da Paz salva mós la hetan nune’e iha minutu 35, jogadór Serafim Brito (17), prodús tan gou ida aumenta rezultadu ba 3-0.
Golu ne’e hanesan golu ikus iha jogu primeira parte tanba to’o minutu termina laiha tan golu ruma, ikus Warikoan lidera provijoriu jogu ho eskore 3-0.
Dolar ba segunda parte Bairo da Paz utiliza enerjia hotu, oinsa bele duni tuir golu tolu ne’e, maibé Warikoan la fó fatin, la fó Bairo da Paz atu prodús golu tuir hakarak.
Nune’e Bairo da Paz falla total iha nia jogu. Tenke lakon bola barak, fintas ba fintas mai maibé ikus lakon iha finalidade, nune’e Warikoan nafatin domina jogu.
Jogu la’o to’o minutu 82, jogadór Warikoan , Angenuco Freitas, aumenta tan golu ida muda rezultadu ba 4-0. Ho golu ne’e halo Bairo da Paz tenke servisu maka’as, nune’e iha minutu 83, jogadór Bairo da Paz, Lourenço Ximenes, responde duni golu ida hodi nakfilak rezultadu ba 1-4.
Nune’e to’o jogu termina vitoria hela ba Warikoan hodi rekolla pontu tolu, Bairo da Paz hela ho derrota ho pontu zero.
Vitoria ne’ebé Warikoan hetan lori ekipa ne’e okupa iha pozisaun primeiru grupu G ho pontu hitu, lozisaun segundu Assa FC ho pontu haat no ekipa rua ne’e mak konfirmadu ultrapasa ba jogu oitavu finál. Enkuantu Bairo da Paz labele ona hakat ba oin tanba hela de’it ho pontu tolu, no Irmão Timor okupa pozisaun ikus liu ho pontu zero.
Jogu ne’e lidera husi árbitru prinsipál Pedro Carvalho, juiz liña António Carvalho Mario Ximenes no árbitru rezerva Bernanrdino Mascarinhas.
Notísia relevante:Kopa Xanana, Warikoan FC “lulun” Irmão Timor 2-0
Jornalista: Hortencio Sanchez
Editór: Florencio Mirandan Ximenes
