DILI, 05 juñu 2024 (TATOLI)—Estudante Universidade Nasionál Timor-Lorosa’e (UNTL) husi Departamentu Jeolojia Petróleu, Fakuldade Enjeñaria, Sidelicio Da Silva, preokupa tanba durante ne’e edifísiu universidade iha Hera laiha morru.
“Morru iha oin ne’e uza rede no iha kotuk ne’e uza kalen hodi didin ba, entaun ida-ne’e preokupasaun boot ba ami estudante sira tanba komunidade nia animál tama-sai hodi estraga ai-horis sira iha laran,” Estudante informa, kuarta ne’e.
Nune’e, nia husu ba parte relevante sira atu tau atensaun ba kestaun ne’e tanba bainhira husik beibeik maka animál sei tama-sai ho livre no fó mós imajen ladi’ak tanba UNTL nu’udar universidade públiku.
Notísia relevante : UNTL tinan ne’e sei fó graduasaun ba estudante 1.729
Hatan ba preokupasaun ne’e, Reitór UNTL, João Martins, hateten, kestaun morru nafatin konsidera maibé daudaun sei kompleta uluk infraestrutura.
“Kestaun morru ne’e ami presiza, maibé ami tenke foka uluk lai oinsá atu konstrui infraestrutura. Morru ne’e mós sai preokupasaun ida ba ita maibé agora hanoin oinsá alastra saladeaula ba fakuldade foun sira. Ida-ne’e depende ba Orsamentu Jerál Estadu. Ami propoin dala hira ona maibé seidauk hetan aprovasaun, maibé tinan-2025 ami kontinua submete proposta ba Governu espera katak bele aprova. Prontu sai ami-nia preokupasaun hotu, tanba animál tama hodi estraga jardín no konstrusaun sira iha laran,” João Martins, dehan.
Reitór ne’e fó hanoin ba estudante sira hodi mobiliza malu hodi halo morru provizóriu.
“Ita la presiza morru ne’ebé iha parade, enkuantu ita-nia orsamentu la to’o, maibé halo ho ai ruma nune’e satan animál labele tama,” nia sujere.
Jornalista : Osória Marques
Editora : Julia Chatarina
