DILI, 27 juñu 2024 (TATOLI)– Konstrusaun Eskola Pre-Eskolár Caridade Santa Cruz atinje ona 85% no hein entrega ba Governu.
“Eskola ne’e nia progresu konstrusaun atinje ona pursentu 85, falta 15%, tanba fallansu husi bee posu ne’e,” Diretora EPE Caridade, Romana Oliveira, informa ba Agência Tatoli, iha ninia knar fatin, Quintal-kiik, kinta ne’e.
Bazeia ba Bill of Quantity (BoQ) katak bee posu ne’e halo baibain de’it, maibé bainihira konstrusaun atu finaliza mak bee ne’e nunka maran, tanba ne’e mak parte eskola komunika ba Ministériu Edukasaun (ME) hodi sosa porfil hodi uza osan kontijénsia nian ho montante $3.000.
“Deside sosa porfil nune’e rezervatóriu bee ne’ebé mosu hela de’it ne’e. Ida-ne’e mak sai fallansu ida konstrusaun atu finaliza, loloos ne’e finaliza kleur ona,” nia akresenta.
Eskola ne’e besik finaliza ona konstrusaun maibé presiza harii mós morru protesaun.
“Ha’u husu Ministériu Edukasaun atu morru protesaun ba ami-nia eskola, ita haree eskola foun ne’e di’ak ona, entaun tenke iha morru nune’e animál labele tama mai laran hodi estraga sasán eskola nian,” Diretora rekomenda.
Notísia relevante : Projetu konstrusaun eskola tinan-2021, falta 14 mak seidauk finaliza
Totál estudante iha eskola ne’e hamutuk 185, kompostu hosi Nol kiik sala rua no Nol boot sala rua, ne’ebé kada sala iha estudante 25 no iha balun 28.
Husi tinan 2016 to’o tinan 2023, EPE Caridade fó graduasaun ba estudante hamutuk 1.000-resin ona, ne’ebé ada tinan simu estudante 184 maibé depende ba nesesidade.
Tuir Diretora ne’e, profesór iha na’in-neen maibé ida kontratu hapara ona iha tinan 2023, entaun hela na’in-lima. Maski nune’e, sufisiente ona maibé atu aula la’o normál tanba ho labarik kiik maka presiza tan profesór na’in-rua.
“Ami presiza tan profesór na’in-rua tanba kuandu profesór balun moras, entaun ami tau hamutuk estudante sai ulun moras,” nia dehan.
Totál saladeaula iha rua no iha mós sala profesór nian inklui kazadebañu. Maibé ba eskola foun iha saladeaula rua inklui ho sala profesór, kuziña no kazadebañu.
Eskola ne’e harii iha 2003 ho nia profesora na’in-rua de’it, ne’ebé profesora na’in-rua ne’e mak tama-sai uma hodi buka estudante. Entaun, dalaruma estudante na’in-0rua ou tolu de’it.
Governu aloka osan $94.807,74 ba servisu husi grupu komunitáriu suku Santa Cruz, ne’ebé konstrusaun ne’e hahú iha setembru 2023 to’o marsu 2024.
Jornalista : Osória Marques
Editora : Julia Chatarina
