DILI, 02 Jullu 2024 (TATOLI) – Institutu Kualidade Timor-Leste (IQTL, sigla portugés) hahú halo divulgasaun, iha fulan ne’e, dekretu-lei rua ne’ebé prodús iha tinan kotuk.
Dekretu-lei sira ne’e mak númeru 20/2023, kona-ba Sistema Unidade Medida Legál no dekretu-lei númeru 40/2023, kona-ba Rejime Jerál Kontrolu Metrolójiku.
“Ohin, ekipa bá munisípiu Bobonaro atu hahú halo sosializasaun dekretu-lei númeru 20/2023 no dekretu-lei númeru 40/2023”, Prezidente IQTL, Rosito de Sousa Monteiro dehan ba Tatoli iha Timor Plaza, ohin.
Nia hateten sensibilizasaun ba dekretu-lei rua ne’e sei hala’o iha munisípiu hotu, inklui Rejiaun Administrativa Espesiál Oé-Cusse Ambeno (RAEOA), ba prezidente autoridade sira no ba setór privadu sira, tanba lei ne’e iha futuru sei implementa ba sira.
“Entaun, lei iha ona, ita tenke sosializa ba sira, nune’e sira bele hatene objetivu no lala’ok husi dekretu-lei rua ne’e. Atividade divulgasaun ne’e foin hahú tanba hanesan hotu-hotu hatene iha fulan hira bá kotuk funsionáriu IQTL nia kontratu la renova, entaun foin hala’o fali atividade, tanba hetan ona renovasaun kontratu”, esplika.
Nia salienta katak haree ba dekretu-lei kona-ba Rejime Jerál Kontrolu Metrolójiku maka, iha tinan ne’e, IQTL hamutuk ho jurídiku sira elabora hela rezolusaun Governu nian kona-ba selu taxa nian, katak instrumentu medisaun sasukat hotu-hotu mak utiliza ba fa’an tenke selu taxa ba Estadu.
“Rejista instrumentu katak instrumentu hotu ne’ebé sira iha molok atu halo tranzisaun ba komérsiál tenke selu uluk lai taxa ba iha banku, lori resibu mai ami halo verifikasaun ba iha sira-nia instrumentu mak foin hahú halo tranzisaun”, dehan.
Nia fó ezemplu ba ema sira ne’ebé fa’an ikan uza balansa (dasi) iha merkadu, loja no estasaun kombustível sira, bainhira dekretu-lei ne’e hetan ona aprovasaun sira sei selu taxa ba Estadu bainhira halo kalibrasaun ba sira-nia ekipamentu ne’e.
“Ita presiza halo ida ne’e tanba dalabarak ema kestiona. Ezemplu, sasán ne’ebé vendedór fa’an tetu nia kuantidade kilo ida, maibé realidade la to’o kilo ida”, esplika.
Notísia relevante: Ekipamentu ba kalibrasaun ba laboratóriu IQTL sei to’o iha tempu badak
Jornalista: Arminda Fonseca
Editora: Maria Auxiliadora
