DILI, 16 jullu 2024 (TATOLI)–Ministériu Edukasaun (ME) liuhusi ninia Sekretáriu Estadu Ensinu Sekundáriu Jerál no Ensinu Tékniku Vokasionál, Domingos Lemos Lopes, distribui materiál prátika ba Eskola Ensinu Sekundáriu Tékniku Vokasionál (ESTV) 28 Novembru Becora hodi halo prátika no prosesu aprendizajen loron-loron nian.
“Ohin mai halo distribuisaun materiál prátika hanesan ekipamentu departamentu eletróniku inklui ekipamentu instalasaun bázika, no ekipamentu instalasaun indústria, fornese ekipamentu Ar Conditioning (AC) ba Eskola Tékniku Vokasionál 28 Novembro Becora,” Sekretáriu Estadu Domingos, hateten, hafoin entrega materiál iha salaun eskola, Becora, tersa ne’e.
ME foin konsidera proposta tinan 2023 nian nune’e ohin bele distribui no tuir planu tinan oin atu distribui tan ba ESTV sira seluk iha Dili no munisípiu seluk.Nune’e, governante ne’e husu ba benefisiáriu sira, liu-liu estudante sira atu kuidadu ekipamentu sira nune’e bele dura to’o tinan barak nia laran.
“Tenke sente ekipamentu hirak ne’e hanesan ita-nia sasán privadu nune’e bele kuida didi’ak tanba kuandu dehan Estadu nian mak ita uza la kleur a’at no tinan-tinan tenke sosa hela de’it,” nia akresenta.
Diretór Eskola ESTV 28 Novembru Becora, Tomás Pinto, agradese ba ME tanba bele nesesita eskola nia preokupasaun durante ne’e.
“Ami agradese tebes ba Ministériu tanba entrega ona materiál no ekipamentu ne’ebé liga ba prátika, ne’ebé maka durante ne’e ami hein durante tinan barak. Ba futuru ami sei hakas-an atu halo planu di’ak liután ba estudante sira-nia futuru tanba ekipamentu sira ne’e liga liu ba prátika estudante sira-nian. Tanba durante ne’e sira halo prátika maibé ekipamentu laiha,” Diretór Tomás Pinto dehan.
Notísia relevante : Eskola ESTV 28 Novembru Becora nia atividade ensinu la’o di’ak
Maski nune’e, Diretór dehan Governu seidauk atende proposta hotu, nune’e ezijénsia sira sei tama ba programa Governu iha tinan 2025.
Durante ne’e estudante sira halo prátika ho profesór produtivu no kontribuisaun inan-aman, ne’ebé kada departamentu iha nia planu rasik atu organiza sira-nia prátika.
“Profesór ne’ebe liga ba departamentu haat ne’e mak menus maibé ami-nia mehi ida-ne’e hein husi loron ba semana fulan ba tinan, loron barak nia laran ami hein hahú husi inísiu konversaun loke Eskola ESTV 28 Novermbru husi ESJ 28 novembru iha tinan 2016 nunka mais mosu ekipamentus maibé mehi ida-ne’e konsege mosu iha IX Governu tanba la’os de’it problema eskola ida-ne’e nian maibé ita hetene katak iha territóriu laran tomak ninia problema hotu, entaun sai difikuldade ba ekipamentu hirak ne’e atu to’o iha fatin,” nia tenik.
Iha biban ne’e mós , parte eskola husu atu aumenta profesór.
ESTV 28 Novembru iha departementu haat mak hanesan artegráfika, eletrónika, eletrisidade, no informátika. Totál estudante iha eskola ne’e hamutuk 524 ho profesór na’in-43.
Jornalista : Osória Marques
Editora : Julia Chatarina
