OÉ-CUSSE, 31 Jullu 2024 (TATOLI) – Eskola Bázika Filiál (EBF) 30 Agostu Masin, ne’ebé lokaliza iha aldeia Sanane, suku Costa, sub-rejiaun Pante Makasar, iha Rejiaun Administrativa Espesiál Oé-Cusse Ambeno (RAEOA) husu ba Governu, liuliu autoridade RAEOA atu konstrui muru protesaun eskola nian.
Koordenadór EBF 30 Agostu Masin, Belarmino Beto, dehan lokalizasaun eskola ne’e besik estrada públiku, bainhira la konstrui maka perigu tebes ba alunu sira bainhira halo movimentasaun.
“Ha’u mai iha eskola ne’e kuaze fulan rua ona, maibé ha’u rasik observa perigu tebes, tanba eskola ne’e besik estrada públiku. Ami-nia eskola iha alunu 580, susar tebes kuandu laiha muru protesaun, tanba movimentu transporte ba-mai, alunu sira mesak labarik de’it. Ida-ne’e mak sai problema boot iha ami-nia eskola”, Belarmino Masin hato’o, ohin.
Notísia relevante: Edukasaun Oé-Cusse sei harii projetu eskola 25
Koordenadór ne’e dehan bainhira laiha apoiu mak sira labele halo buat ida, liuliu harii muru ne’e. “Ha’u iha kapasidade atu halo área eskola sai seguru no hafurak liuhusi kuda ai-oan no ai-funan, maibé laiha muru protesaun, entaun susar atu kontrola animál tama-sai”, nia dehan.
Atu solusiona problema ne’e, nia hatama ona proposta ba iha Gabinete Prezidente Autoridade RAEOA, maibé resposta ne’ebé nia hetan katak proposta ne’e integra ona iha Orsamentu Jerál Estadu (OJE) iha Planu Asaun Anuál (PAA) 2025 nian.
Aleinde ne’e, nia kontinua submete proposta ba iha Programa Nasionál Dezenvolvimentu Suku (PNDS), liuhusi autoridade komunitária suku Costa nian no hetan ona resposta pozitivu katak iha agostu tinan ne’e mak foin bele rona rezultadu finál.
Notísia relevante: Inácia Tamele prioriza programa haat hodi hadi’a kualidade edukasaun Oé-Cusse
Koordenadór ne’e kontinua hatama proposta ba iha Cruz Vermelha Timor-Leste (CVTL) filial Oé-Cusse, maibé laiha resposta tanba misaun CVTL responde ba de’it iha área rurál, la’ós iha área urbana.
“To’o agora ha’u hein de’it PNDS, tanba eskola ne’e tinan barak ona nia kondisaun laiha mudansa, ne’ebé protesaun ne’e tenke iha liuliu mak muru ne’e. Ami la persiza buat barak, bainhira muru ne’e iha bele rezolve ona ami-nia problema”, nia afirma.
Antes ne’e, xefe suku Costa, Francisco Colo, rekomenda mós ba PNDS atu konsidera proposta husi EBF 30 Agostu Masin. “Ha’u husu ba ekipa téknika PNDS atu haree asuntu ida iha eskola Masin ne’e, tanba besik estrada públiku, movimentu transporte bá-mai no estudante sira maioria menór no fó perigu ba sira-nia vida”, nia fó hanoin.
Hatán ba preokupasaun ne’e, Sekretária Rejionál Edukasaun no Asuntu Sosiál, Inácia Tamele, konsidera problema iha setór edukasaun, liuliu harii muru protesaun barak mak seidauk rezolve.
“Ha’u hanoin problema muru ne’e, la’ós eskola ne’e de’it, maibé eskola barak nia kondisaun hanesan, ne’ebé tuir planu eskola ida iha tinan ida nia hetan projetu ida, labele hetan hotu kedas, maibé ami hatama ona iha planu ba tinan oin, ita espera sei fó solusaun”, nia promete.
Notísia relevante: Edukasaun Oé-Cusse sei distribui tán mobiliáriu ba eskola
Estudante iha Eskola Bázika Filiál 30 Agostu Masin hamutuk 580 ho totál profesór hamutuk na’in-22, komposta husi mane hitu no feto 15.
Jornalista: Abílio Elo Nini
Editora: Maria Auxiliadora
