OÉ-CUSSE, 05 Agostu 2024 (TATOLI) – Diresaun Serbisu Aeroportu Rota do Sândalo realiza enkontru tékniku koordenasaun ho parte Indonézia hodi ko’alia kona-ba Servisu Tráfiku Aéreu ka Air Traffic Service (ATS, sigla inglés), ne’ebé realiza iha salaun aeroportu iha Rejiaun Administrativa Espesiál Oé-Cusse Ambeno (RAEOA).
Asesór Tékniku Aviasaun Apoia Gabinete Prezidente Autoridade RAEOA, Nídio Lobato, informa katak durante ne’e operasaun aviaun Aero Dili bá Oé-Cusse sempre uza espasu aéreu Indonézia nian, tanba ne’e liuhusi deskusaun bele hametin liña koordenasaun, nune’e ba futuru operasaun Aero Díli bele hala’o iha Atambua no Kupang.
Notísia relevante: Autoridade RAEOA sei estabelese Autoridade Portuáriu atu jere rasik aeroportu Rota do Sândalo
“Ami konvida reprezentante husi Governu Indonézia, liuliu servisu aeroportu hodi hala’o diskusaun kona-ba Servisu Tráfiku Aéreu husi parte nasaun rua kona-ba ita-nia aviaun Aero Dili agora halo operasaun husi Oé-Cusse ne’ebé tama sira-nia área, liuhusi Atambua-Kupang. Iha futuru mai depois ita sertifika aeropoertu, ita sei apply mós ba rute hanesan Indonézia-Bali, Jakarta ho nasaun sira seluk”, Nídio Lobato dehan iha aeroportu Oé-Cusse, ohin.
Nia konfirma katak enkontru ofisiál ne’e realiza durante loron rua, hahú segunda to’o tersa, atu diskute kle’an kona-ba prioridade no polítika tékniku aviasaun ba futuru entre aeroportu Oé-Cusse no Indonézia.
Asesór tékniku ne’e espera iha tinan oin aviaun Timor-Leste bele semo ona iha international flight, liuhusi espasu Indonézia nian.
“Ita iha planu ba ida-ne’e, ita hatene aeroportu Oé-Cusse ho nia pista naruk 2.300. Iha futuru, ita planu atu halo aeroportu ne’e sai internasionál, depois sertifika tiha bele transit husi nasaun seluk bá nasaun seluk, liuliu atu bá Indonézia, karik husi Bali atu bá Austrália sei transit iha aerportu Oé-Cusse”, nia adianta.
Notísia relevante: Primeiru Ministru lansa voo dahuluk aviaun Aero Dili ba Oé-Cusse
Iha fatin hanesan, Xefe Jestaun ba Diresaun Navegasaun Aérea Indonézia, Nurdini Tambuman, konsidera enkontru ofisiál ne’e importante ba nasaun rua ne’e atu diskute ba futuru hodi bele koordena serbisu ho di’ak.
“Ami agradese tanba enkontru tékniku ne’e importante atu koordena Servisu Tráfiku Aéreu, tanba aeroportu Oé-Cusse hala’o ona operasaun dezde Maiu 2024, nune’e ita bele garante seguransa vou iha Oé-Cusse no klaru mós iha área haleu Oé-Cusse, fronteira entre Indonézia no Timor-Leste, nune’e ami sei hala’o diskusaun hamutuk ba Servisu Tráfiku Aéreu kona-ba koordenasaun entre ekipa Oé-Cusse ho aeroportu Indonézia, nune’e vou sira husi Oé-Cusse bele seguru”, katak.
Notísia relevante: Rogério Lobato sei aumenta voo entre Dili-Oé-Cusse kada semana dala tolu
Hola parte iha enkontru koordenasaun ne’e ekipa Aeroportu no Navegasaun Timor-Leste, Empreza Públika (ANATL, E.P), Autoridade Aviasaun Sivíl Timor-Leste, (AACTL, sigla portugés), inklui tékniku no funsionáriu sira iha aeroportu Rota do Sândalo Oé-Cusse.
Jornalista: Abílio Elo Nini
Editora: Maria Auxiliadora
