DILI, 5 agostu 2024 (TATOLI) – Diretór Nasionál Komérsiu Esteriór (DNCE) husi Ministériu Turizmu no Komérsiu, Mário Abrão, hateten Timor-Leste esporta ona kafé Arabica no Robusta, entre janeiru to’o juñu, hamutuk tonelada 906,84. Ho reseita ba Estadu hamutuk millaun tolu dolár amerikanu.
“Hosi janeiru mai ne’e, ita esporta ona kafé Arabica no Robusta hamutuk tonelada 906,84, ne’ebé rezulta reseita dolar millaun tolu ba kofre Estadu”, Mário Abrão, informa ba TATOLI iha nia kna’ar fatin MCI, Bebora, ohin.
Nia esplika, empreza Outspan, People Trade, Café Bris no Timor Global mak esporta kafé ba nasaun Estadu Unidus Amerika, China, Japaun, Austrália, Indonézia, Tailandia, Singapura, Nova zelandia no Portugal.
Abrão afirma, Diresaun Nasionál Komérsiu Esteriór (DNCE) rejista ona esportasaun du’ut tasi, kami, nuu maran, kinur, karau kulit, maek no maek uut ho ekivalente rihun $56, ba merkadu sira ne’ebé rejista ona hanesan Japaun, Singapura Xina no Indonézia.
“Iha fulan neen dahuluk, besi-foer tonelada tolu resin mós esporta ba Xina, Singapura, Japaun, Malázia no EUA. Esportasaun ne’e rezulta kobransa osan dolar rihun lima iha impostu ba kofre Estadu”, nia relata.
Diretór ne’e dehan, iha períodu fulan neen, DNCE rejista importasaun veíkulu hamutuk 17.707, kompara ho tinan kotuk hamutuk 27.129. Kareta sira ne’e mai husi Japaun, Austrália, Xina no Indonézia.
Mário Abrão klarifika katak DNCE rejista de’it veíkulu sira, kona-ba valór hosi taxa ba importasaun veíkulu sira ba kofre Estadu nian, ida-ne’e kobre hosi Diresaun Nasionál Transporte Terrestre nian (DNTT), hosi Ministériu Transporte no Telekomunikasaun nian.
“Ami-nia responsabilidade ba rejistu veíkulu sira iha portu no fó sai dokumentu pré-aprovasaun ba empreza importadór sira, depois mak Alfándega nu’udar entidade ne’ebé responsabiliza atu fó lisensa hodi hasai sasán, enkuantu selu taxa ba DNTT”, nia konklui.
Jornalista : Felicidade Ximenes
Editór : Zezito Silva
