DILI, 19 agostu 2024 (TATOLI)—Jerente Organizasaun Naun Governamentál, Asosiasaun HAK tau esperansa, iha ámbitu komemorasaun loron konsulta populár (30 agostu 1999) ba dala-25 ne’e, líder nasionál sira bele fó liman ba malu ba dezenvolvimentu nasionál.
“Reflesaun ne’e líder nasionál sira tenke halo duni sei hanoin ne’e momentu loron konsulta populár tinan-25 ona, saida mak uluk 1999 antes ne’e husi luta tesik mai saida mak maun boot sira promete hela, halo promesa saida mak atu halo bainhira ita ukun-an. Líder nasionál sira ne’e hamutuk iha momentu balun sira hamutuk, iha hanoin balun mak sira diferensa maibé se iha asuntu balun ligadu ho interese nasionál ne’ebé ba ema barak nia interrese sira hamutuk, sira apoiu malu,” Vise-Diretór I Asosiasaun Hak, Antonino de Limas, hateten ba Agência Tatoli, iha ninia knaar fatin, Farol, segunda ne’e.
Notísia relevante : Konsulta Populár ba da-25: PPN apela timoroan hamutuk luta ba dezenvolvimentu
Nia dehan, kuaze tinan-25 ne’e tesik mak sira kaer ukun, di’ak ne’ebé sira halo ne’e husik populasaun sira mak sente atu gaba ka hahí sira ne’e husik, maibé sira haree dehan durante tinan-25 ne’e hakat sira-nia desizaun balun keta sala karik sira tenke refleta ida-ne’e.
“Sira (líder) mós tenke halo reflesaun katak sé idade pur natureza ita hakat neineik ona la hanesan uluk, hakat sei dook ona, hanoin ne’e mós la ladun kroat ona to’o tempu deskansa, Timor ne’e ho ema millaun 1,4 ne’e atu dehan sei iha ema barak atu halo kontinuasaun ne’ebé katuas sira ho idade ona hakat la dook ona, hanoin mós dala ruma ohin hatete buat ida, aban hatete buat seluk, se deskansa karik deskansa ona ba,” nia akresenta.
Tanba ne’e, iha ámbitu vizita Papa Francisco, nia espera líder nasionál sira mós presiza hamutuk halo reflesaun.
“Reflesaun haree iha aspetu morál ne’e ita iha ne’ebé, iha vizita Papa nian ne’e momentu di’ak ida halo reflesaun. Ha’u hanoin barak mak esperansa ne’e líder nasionál atu fó liman ba-malu, maibé ita atu hateten, sira atu fó liman ba malu ka la fó liman ba malu mós tinan-2 ukun-an ne’e sira de’it mak ukun ne’e, sé mak troka malu. Entaun, atu dehan di’ak ka la di’ak sira kontribui ba di’ak maibé sira la di’ak malu mós kontribui ida la di’ak ne’e mós sira nian,” nia tenik.
Antonino de Limas, rekoñese, nasaun demokrasia ne’e sempre iha diferensia, maibé agora importante mak ba kestaun Estadu, ba interese nasionál no kontribui ba dezenvolvimentu nasionál.
“Ha’u hanoin loloos ne’e ita preokupa oinsá líder foin-sa’e sira atu mosu depois ita labele depende demais ba katuas sira,” nia katak.
Jornalista : Osória Marques
Editora : Julia Chatarina
