LIQUIÇÁ, 22 agostu 2024 (TATOLI)–Empreza xineza, China Nuclear CN22, kinta ne’e, entrega ekipamentu parsiál ba kolesaun no transportasaun lixu ba Autoridade Munisípiu Dili (AMD), iha suku Tibar, munisípiu Liquiçá, hodi halo jestaun ba lixu iha kapitál Dili.
Prezidente Autoridade Munisípiu Dili, Gregório Saldanha, agradese ba Governu anteriór ne’ebé inisia kontratu ne’e iha tinan 2022 ho empreza xineza ne’e hodi halo jestaun ba lixu iha kapitál Dili.
“Ida-ne’e obra ida husi VIII Governu Konstitusionál mak inisia, IX mai kontinua obra ida-ne’e. Ita agradese tanba nu’udar meiu ida atu ita bele halo jestaun ba lixu iha Dili laran, ho ekipamentu modernu sira ne’e bele tulun ita atu halo ita-nia Dili sai mós tuir moto Dili nian,” Gregório Saldanha hateten hafoin serimónia entrega.
Nune’e, Autoridade munisipál ne’e husu ba komunidade atu iha konsiénsia hodi tau lixu iha ninia fatin.
“Ita iha ona ekipamentu modernu atu rekolla lixu iha Dili, maibé husu ba komunidade mós tenke kontribui, soe lixu iha nia fatin no hamos ita-nia hela fatin, atu nune’e ita kontribui ba Dili moos,” nia hameno.
Notísia relevante : China Harbour konstrui ona fatin hatuur kaixote lixu 600-resin
Iha fatin hanesan, Prezidente Repúblika, José Ramos-Horta, apresia serbisu Prezidente Autoridade.
“Parabéns ba Prezidente Autoridade Dili ne’ebé serbisu di’ak tebes, tenke nune’e bainhira Governu anteriór halo hela buat di’ak balun, tenke kontinua atu dezenvolve kapitál Dili. Parabéns mós ba IX Governu ne’ebé revee kontratu ba projetu ne’e atu hadi’a setór ne’ebé importante tebes, la’ós de’it ba sidade nia beleza maibé ba mós saúde públika,” Horta tenik.
Governu halo kontratu ho empreza ho tipu tolu mak hanesan:
- Kontratu 006, kolesaun no transportasaun liuhusi ekipamentu fornesidu bele utiliza hodi kolleta no transporta lixu sira iha Dili laran lori ba aterru iha Tibar.
- Kontratu 007, dezeñu reabilitasaun konstrusaun, reabilitasaun no operasaun hodi mellora aterru sanitáriu.
- Kontratu 036, fornesimentu ekipamentu no ekipamentu hirak ne’e mak sei utiliza ba halo kolesaun no transportasaun lixu sira iha Dili laran, ne’ebé kontratu hirak ne’e sai hanesan projetu pilotu ho nia objetivu atu mellora jestaun lixu iha Dili laran.
Kontratu ne’e rasik iha lote tolu:
- Lote 1: lixeira no kontentór
- Lote 2: kolesaun no transportasaun, iha veíkulu barak atu tula lixu.
- Lote 3: ekipamentu pezadu balun ne’ebé seidauk prontu no iha hela prosesu.
Ministériu Administrasaun Estatál hanesan na’in ba projetu no jere husi AMD liuhusi Unidade Jestaun Projetu, ne’ebé projetu ne’e asina iha tinan 2022.
Empreza entrega ekipamentu kolesaun no transportasaun ra’ut lixu no fatin lixu ne’ebé ho medida oin-oin hanesan ekipamentu kolesaun no transportasaun ra’ut lixu, inklui kamioneta tula lixu.
Hafoin fatin lixu ne’e rasik ho nia medida oin-oin, ekipamentu pezadu inklui ekipamentu ba roda tolu ne’ebé mak sei utiliza tama-sai bairru sira iha Dili.
Ekipamentu ba roda tolu hamutuk 10, fatin lixu 1.000 kompostu husi litru 1,1, 2,4 inklui metru kúbiku 1,1, metru kúbiku 8 no metru kúbiku 20.
Jornalista : Hortencio Sanchez
Editora : Julia Chatarina
