DILI, 28 agostu 2024 (TATOLI)—Kordenador liturjia ba Amu Papa nia vizita iha Tasi-Tolu, Pe. Justino Tanec, hateten membru koru husi dioseze Baucau, Dili no Maliana hamutuk 1.100 sei hala’o ensaiu ikus nian iha loron 08-10 setembru 2024.
Notísia Relevante: Membru koru 1.100 sei hala’o ensaiu hamutuk iha fulan-agostu nia klaran
Grupu koru husi dioseze tolu ne’e sei halibur hamutuk hodi konsentra iha Dili iha loron ida, molok atu hahú hala’o ensaiu ikus nian, ba preparasaun misa solene ne’ebé Papa Francisco sei prezide iha 10 setembru 2024, iha tuku 16h30 lorokraik, iha Tasi-Tolu.
“Husi ema sira-ne’ebé partisipa liturjia hanesan koru, ami sei mai enasiu hamutuk ikus nian loron 08-10 dadeer,” Keordenadór ba misa liturjia Amu Papa nian iha Tasi-Tolu, Padre Justino Tanec, hateten ba Agência Tatoli, iha Tasi-Tolu.
Nia hateten, iha loron 18 agostu liuba, grupu koru sira-ne’e halo ensaiu hamutuk ona, tanba ne’e antes atu misa ne’e sei iha ensaiu hamutuk tan hodi bele iha preparasaun di’ak liután.
Aleinde ne’e. nia dehan, iha ona preparasaun ba ministru estraordináriu mós sei to’o iha Dili iha loron 07 setembru. atu bele iha treinamentu ida hamutuk no organiza malu ba fatin sira-ne’ebé atu fahe komunãun ba sarani sira iha Tasi-Tolu.
“Iha parte seluk ministru estraordináriu ba komuñaun sira mós preparadu ona no loron 08 agostu ne’e, sira mai konsentra iha Tasi-Tolu atu ami treina hamutuk,” nia dehan.
Lada seksaun ba liturjia ba misa solene Amu Papa nian iha Tasi-Tolu ne’e, nia dehan, agora daudaun halo hela servisu intensivu ida atu halo preparasaun sira la’o ho másimu.
Jornalista : Jesuína Xavier
Editór : Cancio Ximenes
