DILI, 28 Agostu 2024 (TATOLI) – Ministru Negósiu Estranjeiru no Kooperasaun, Bendito Freitas, hasoru malu ho eis-Reprezentante Espesiál Sekretariu-Jerál Organizasaun Nasaun Unida (ONU), Sukehiro Hasegawa, hodi diskute kona-ba Timor-Leste nia partisipasaun iha mundu, liuliu kontribui ba pás.
“Simu ita-nia bainaka espesiál ne’ebé marka mós istória iha ita-nia konstrusaun Estadu, señór Sukehiro. Nia uluk hanesan mós Reprezentante Permanente Sekretariu-Jerál ONU nian, hanesan mós Koordenadór Rezidente ba Misaun ONU iha Timor-Leste. Durante ami hasoru malu, nia haree Timor-Leste nia partisipasaun importante tebes ba mundu, liuliu kontribui ba pás,” Ministru Bendito hateten ba jornalista sira iha Praia dos Coqueiros, ohin.
Governante ne’e relata katak, durante iha reuniaun, Sukehiro Hasegawa afirma figura nasionál hanesan José Ramos Horta no Kay Rala Xanana Gusmão atu hamutuk fó ideia hodi kontribui ba mudansa polítika globál, liuliu kona-ba reforsu sistema servisu operasaun ONU.
“Sira dehan Timor-Leste rai ki’ikoan, maibé bele tulun hodi halo reforma. Sukehiro hateten mós posibilidade Sekretáriu-Jerál ONU, António Guterres, iha ne’e hela, Prezidente Repúblika no Primeiru-Ministru bele haree kona-ba papél nivél altu ida ne’ebé bele servisu reforma ba Nasaun Unida. Timór bele rai ki’ikoan, maibé ida ne’e momentu istóriku ida. Señór Sukehiro mós afirma katak Japaun kontinua apoia Timor-Leste iha meiu saida de’it”, ministru adianta.
Governante ne’e hatutan katak ho apoiu hirak ne’e fó kbiit ba Timor-Leste atu iha lian maka’as liután iha mundu ba rezolusaun konflitu globál.
Profesór Sukehiro Hasegawa iha karreira tinan 37 iha ninia serbisu ba Nasaun Unida molok reforma iha fulan-Setembru nia rohan iha 2006. Nia sai hanesan Reprezentante Espesiál Sekretáriu-Jerál ONU nian ba Timor-Leste husi loron 21 fulan-Maiu 2004 to’o loron 30 fulan-Setembru 2006. Nia mós hala’o serbisu hanesan Xefe Misaun Apoiu Nasaun Unida nian iha Timor-Leste (UNMISET) husi Maiu 2004 to’o Maiu 2005; Xefe Gabinete Nasaun Unida nian iha Timor-Leste (UNOTIL) husi Maiu 2005 to’o Agostu 2006.
Xefe Misaun Integrada Nasaun Unida (UNMIT) nian husi loron 25 Agostu to’o ba loron 30 Setembru 2006. Husi Jullu 2002 ba to’o Jull 2006, Sukehiro Hasegawa sai mós hanesan Koordenadór Rezidente Nasaun Unida nian ba Timor-Leste no Reprezentante Rezidente Programa Nasaun Unida nian ba Dezenvolvimentu (PNUD).
Jornalista: Hortencio Sanchez
Editora: Maria Auxiliadora
