DILI, 28 Agostu 2024 (TATOLI) – Sekretáriu-Jerál Organizasaun Nasaun Unida (ONU), António Guterres, to’o ona iha Timor-Leste iha tuku 15h38 ho aviaun E190 QANTAS LINK. Líder ONU ne’e mai ho nia delegasaun hamutuk 100-resin.
Bainhira to’o iha Aeroportu Internasionál Prezidente Nicolau Lobato, António Guterres, simu direta husi Prezidente Repúblika, José Ramos Horta, Primeiru-Ministru, Kay Rala Xanana Gusmão, no membru Governu sira.
Hafoin tun husi aviaun, líder ONU ne’e simu kedan ho parada militár no tara kedan tais husi protokolu sira. “Benvindu mai Timor-Leste”, Xefe Estadu Ramos Horta hato’o no hasoru kedan ho kaer-liman.
Bainhira sai husi aeroportu, António Guterres sa’e kedan kareta ho marka BMW sein númeru mátrikula no akompaña direta husi Polísia Nasionál Timor-Leste no FALINTIL-Forsa Defeza Timor-Leste (F-FDTL) husi Unidade Polísia Militár hodi bá deskansa iha Otél Timor ho akompaña husi karreta haat.
Tuir ajenda, iha loron 28 fulan-Agostu loraik tuku 17:00, Prezidente Repúblika José Ramos Horta sei kondekora António Guterres ho medalla Ordem Timor, Grande Colar iha Palásiu Prezidensiál Dili.
Iha 29 Agostu, Sekretariu-Jerál ONU sei akompaña husi Primeiru-Ministru hodi tuir programa Horta Show iha Muzeu Rezisténsia Dili iha tuku 15:00-17:00. Iha tuku 19:30 to’o 21:30, Sekretériu-Jerál sei jantar hamutuk ho Prezidente Repúblika no Primeiru-Ministru iha Palásiu Nobre Lahane.
Iha 30 Agostu António Guterres sei prezide sesaun solene iha Parlamentu Nasionál husi tuku 10:00 to’o 12:00. Iha tuku 13:00 to’o 14:00, sei partisipa iha komemorasaun Loron Konsulta Populár iha salaun INFORDEPE, Balide, Dili. Iha 18:15 to’o 19:45 sei partisipa iha aniversáriu Konsulta Populár da-25 iha Estádiu Munisipál Dili no sei sai husi Timor-Leste iha loron 31 Agostu.
Notísia relevante: Sekretáriu Jerál ONU konfirmadu partisipa komemorasaun loron konsulta populár
Jornalista: Hortencio Sanchez
Editora: Maria Auxiliadora
