OÉ-CUSSE, 02 Setembru 2024 (TATOLI) – Krús Vermella Timor-Leste (CVTL, sigla portugés) filiál Rejiaun Administrativa Espesiál Oé-Cusse Ambeno (RAEOA) prepara nia vuluntáriu na’in-16 hodi fó primeiru sokorru iha misa ne’ebé sei dirije husi Papa Francisco, iha Tasi-Tolu, Dili, Timor-Leste, iha loron 10 Setembru ne’e.
Koordenadór CVTL filial Oé-Cusse, Domingos Tapen Cune, informa katak molok ekipa dezloka bá Dili partisipa uluk formasaun bázika no téknika, nune’e bele atende peregrinu sira ho di’ak no seguru.
“Matéria iha formasaun ne’e oinsá atu halo transferénsia karik iha peregrinu sira dezmaia ka monu, oinsá ekipa bele evakua husi ne’ebé no lori bá fatin seguru. Ne’ebé, formasaun ne’e kona-ba tékniku ba transferénsia nomós prepara karik asidente ruma akontese balu hetan kanek, ekipa primeiru sukorru prontu atu fó sukorru”, Domingos Tapen Cune dehan ba Tatoli iha Oé-Cusse, ohin.
Notísia relevante: Papa Francisco viajen daudaun mai Indonézia
Nia hateten preparasaun ne’e hahú kedan iha inisíu Agostu no kontinua to’o ohin loron hodi hein kaléndariu ofisiál husi autoridade bainhira dezloka bá Dili.
“Dadeer [matéria sobre] teoria no prátika, loraik prepara fikziku tanba ita hakarak fó seguru ba povu sira”, nia afirma.
Sekretáriu Rejionál ba Asuntu Saúde, Luís de Jesus Neno, fó hanoin katak CVTL tenke prepara ema ho nia kapasidade, fiziku no abilidade ne’ebé di’ak no hatene lala’ok atividade primeiru sokorru nian, nune’e parte CVTL ho parte saúde tenke sai ekipa ida atu kontrola sarani sira husi Oé-Cusse ne’ebé sei tuir misa iha Dili.
“Sira-ne’ebé tama ekipa primeiru sukorue ne’e tenke kumpre regra ne’ebé komisaun organizadora fó sai no tenke hala’o kna’ar tuir matadalan primeiru sukoreu nian, nune’e ita bele atende sarani sira-ne’ebé partisipa misa”, nia konklui.
Prezidente CVTL, Madalena Hanjam, antes ne’e informa ona katak, sira prepara ona voluntáriu ativu 500-resin hodi fó apoia serbisu durante vizita Papa Francisco nian.
“Ami prepara ona voluntáriu ativu liu 500 husi CVTL rasik, depois sira sei bele apoia serbisu ba komunidade hanesan fó primeiru sokorru no nesesidade sira seluk”, Madalena Hanjam hateten foin lalais ne’e.
Notísia relevante: Voluntáriu CVTL 500 preparadu oferese primeiru sokorru durante vizita Papa Francisco
Jornalista: Abílio Elo Nini
Editora: Maria Auxiliadora
